CD: Nuwe tenoorstem
op die gospelmark    

jouvermaak

Kenmerkend van Tiro is sy liefde vir die Here, sy nederigheid en sy glimlag.

Sy tenoorstem is in verskeie artikels al beskryf as "a voice like velvet" en met sy ballades gee hy mense hoendervleis.

Nou is sy debuut-CD, Speak to me, wat beslis groot aanklank onder liefhebbers van die gospel en klassieke-genres sal vind, uitgereik.

Hy open sy album met 'n hoogtepunt: die klassieke gospel-liedjie Gloryland, wat deur 'n unieke verwerking van May the Words opgevolg word. Ander tenoor-juwele op dié album is All Rise, He touched me en Fairest Lord Jesus. Sy weergawe van Koos du Plessis se Gebed staan ook uit.

Tiro is as Tirotsaone Moshosho – wat "werke van God" beteken – in 1986 in Namibië gebore.

Hy voltooi sy matriek in Otjiwarongo, waar hy 'n skoolprefek en die hoofseun van die seunskoshuis was.

Dit is dan ook in sy Graad 12-jaar dat 'n musiekonderwyseres, Evada van der Merwe, hom in die skoolkoor hoor sing en besef dat hy 'n Godgegewe-talent ontvang het. Sy stel hom voor aan een van Suid-Afrika se Drie Tenore, Chris Coetzer, wat so beďndruk was met Tiro se stem, dat hy hom uitnooi om saam met hom aan die einde van 2005 op 'n drie-weektoer Swede toe te gaan. Hier het hulle in katedrale en teaters opgetree.

Terug in Namibië het Evada haar werk bedank en Tiro Suid-Afrika toe gebring waar sy hom vir die afgelope drie jaar help om sy sangloopbaan te vestig. Tiro se eerste optrede in Suid-Afrika was as gaskunstenaar op die TV-program, Noot vir Noot. Sedertdien sing hy veral by korporatiewe funksies, asook by skole, kerke en feeste in Afrikaans, Engels, Sweeds en Italiaans.

Oor sy CD, Speak to Me, sę Tiro dat sy nederige wens is dat almal wat daarna sou luister, God deur die musiek sal hoor praat.