|
Jacob Zuma, ANC-leier en aangewese president van
die land, se mantelswaaiery en die insleep van
God by die politiek, en spesifiek sy stelling
dat God die ANC ondersteun, het die Christen-Demokratiese
Alliansie (CDA) erg ontstel.
"Politiekery hoort nie in die kerk nie," sê ds.
Theunis Botha, ondervoorsitter van die CDA se
leierskapsforum en hoof van die
godsdienslessenaar van die CDA, na aanleiding
van Zuma se toespraak verlede maand tydens 'n
erediens in die Rhema-kerk in Randburg.
"Dit sou 'n onhoudbare situasie skep as alle
politieke partye op 'n soortgelyke geleentheid
sou aandring, terwyl 'n uitsondering aan Zuma
eweneens nie geregverdig kan word nie. Boonop is
Zuma se stelling dat die ANC 'n diep Christelike
tradisie het, onvanpas, nie net omdat die ANC
ook die tuiste van die SAKP is nie, maar
verskeie van sy beleidsrigtings soos dié oor
aborsies en dobbel nie met die Bybel versoenbaar
is nie. 'n Spreekbeurt tydens 'n erediens aan 'n
veelwywer wat onboetvaardig owerspel as verweer
teen verkragting aanvoer, is iets wat die meeste
kerkgenootskappe baie vreemd sou vind. Verder
staar Zuma ook die talle aanklagte van onder
meer korrupsie en bedrog in die sig. Ons herhaal
ons standpunt dat die Christen God se instrument
moet wees, en nie God die mense se instrument
nie – en dit geld ook die politiek."
Na Zuma se Rhema-toespraak, het hy tydens 'n
ander
interdenominale gebedsbyeenkoms die kerkgangers
gevra om te bid dat die ANC die verkiesing sal
wen. Zuma het ook gesê dat God aan die ANC se
kant is "en wie sal dan teen ons kan wees?".
"Dit lyk eenvoudig nie of die ANC, en spesifiek
sy leier, Jacob Zuma, hom steur aan
gerespekteerde kerkleiers se besware oor hoe die
Evangelie nou goedkoop gemaak word nie," is
Botha se ontnugterde kommentaar.
"Vir 15 jaar tydens sy bewind het die ANC uit sy
pad gegaan om Suid-Afrika van sy Christelike
karakter te stroop, soos om aborsies te wettig,
misdadigers meer regte as die wetsgehoorsames te
gee, pornografie en 'n staatslotery te wettig,
terwyl die ouditeur-generaal se verslae op al
drie regeringsvlakke en ander staatsinstellings
'n verhaal van wanbestuur en korrupsie vertel
met weinig teenspoed vir skuldiges, en nou word
hierdie aansprake gemaak."
Botha sê dat daar in Suid-Afrika reeds amper 'n
miljoen wettige aborsies uitgevoer is, terwyl
die lys onskuldige mense wat verkrag en vermoor
is deur geweldenaars wat voortydig op borgtog,
parool of amnestie op vrye voete gekom het, al
hoe langer word.
"Die ANC se aansprake op heiligheid en Zuma se
status as begunstigde pastoor, maak skynbaar
deel van 'n verkiesingstrategie uit, en daarom
sal kiesers voortdurend hiermee gebombardeer
word." |
