|
Die minister van Veiligheid en Sekuriteit, mnr.
Nathi Mthethwa, het skriftelik bevestig dat die
voormalige polisiebaas, Jackie Selebi, se
regskoste, tot op datum, die belastingbetaler
R2,3 miljoen uit die sak gejaag het. Behalwe vir
dié koste ontvang Selebi steeds 'n salaris van
R1 miljoen per jaar al is hy, weens klagtes wat
met dwelmsmokkelary verband hou, van sy pligte
onthef.
Mthethwa het skriftelik op 'n vraag van Pieter
Groenewald (LP) van die VF Plus geantwoord.
Groenewald het verlede jaar al in 'n brief aan
die voormalige minister, Charles Nqakula, gevra
of belastinggeld gebruik gaan word vir Selebi se
regskoste. Nqakula het toe bevestig dat die
staat Selebi se eerste aansoek se koste gaan dra,
maar kon toe nie 'n bedrag gee nie. In dieselfde
skrywe het Nqakula gesê Selebi het vir sy
komende strafsaak aansoek gedoen vir
regsverteenwoordiging op staatskoste, en dat dit
deur die kantoor van die Staatsprokureur oorweeg
word.
"Nou weet ons dat die kantoor van die
Staatsprokureur wel besluit het dat
belastingbetalers moet opdok vir Selebi se
regskoste. Dit is heeltemal onaanvaarbaar dat
belastinggeld gebruik word om Selebi se
regskoste te dra. Selebi het in sy persoonlike
hoedanigheid om sy persoonlike eer te red,
destyds 'n hofaansoek gebring. Die aansoek was
nie in belang van die Polisiediens of
Suid-Afrika nie. Belastinggeld kan ook nie vir
Selebi se strafsaak gebruik word nie. Die
klagtes is nie voortspruitend in die uitvoering
van sy pligte nie en daarom moet Selebi self
opdok vir sy regskoste," sê
mnr. Pieter Groenewald (LP), hoofwoordvoerder
van Veiligheid en Sekuriteit vir die VF Plus.
"Nqakula het gesê dat Selebi se koste gedra word
deur belastingbetalers ingevolge artikel 3 van
die Wet op die Staatsprokureur. Die artikel maak
slegs voorsiening vir gevalle waar optrede in
openbare belang is of waar die staat 'n belang
daarin het. In Selebi se geval was nie een van
hierdie aspekte ter sprake nie. Noudat 'n bedrag
bekend is, sal 'n klagte ingedien word by die
Openbare Beskermer om te bepaal of belastinggeld
nie wanaangewend word nie," het Groenewald gesê. |
