joupolitiek

Onderwysbeleid: Berei voor op sukses

Helen Zille, DA-leier, sê dat die huidige onderwysstelsel misluk het, hoofsaaklik omdat die klem nie op onderwys van gehalte val nie. Die DA het egter 'n alternatiewe plan in plek.

Die Demokratiese Alliansie het verlede maand sy nuwe onderwysbeleid bekend gestel.
Dié beleid, met die titel "Berei voor op sukses", wil onder meer 25 000 onderwysers van gehalte per jaar skep.

Tydens 'n media-inligtingsessie by die Parlement het Helen Zille, die DA se leier, gesê dat die huidige onderwysstelsel misluk het, hoofsaaklik omdat die klem nie op onderwys van gehalte val nie.
Daar is 'n handjievol skole van wêreldgehalte, maar ook talle skole wat net middelmatigheid, apatie en verwaarlosing laat voortleef.
"Suid-Afrika moet die nastrewing van uitnemendheid ook die middelpunt van sy onderwysbeleid maak, en in die beleid wat ons vandag bekend stel, doen ons talle voorstelle wat dit sal bereik," het sy gesê.
"Ons het talle uitsonderlike onderwysers wat die salaris en erkenning moet kry wat hulle verdien. Terselfdertyd kan ons nie meer 'n situasie toelaat waar onderwysers onvoorbereid, laat of glad nie vir klasse opdaag nie, of waar skoolhoofde in skooltye met middagete uit is nie. Die DA se voorstelle vir prestasiebestuur en prestasie-verwante salarisse sal dit aanspreek," sê Zille.

George Boinamo, die DA se woordvoerder oor onderwys, sê die beleid het dit ten doel om te verseker dat alle Suid-Afrikaanse kinders binne 15 jaar skool op die vlak van internasionale norme geletterd en syfervaardig kan verlaat.
Die plan sal vir elke skool 'n kernminimum van hulpbronne waarborg. Stappe sal gedoen word, met inbegrip van 'n verband tussen skoolopleiding en kindersteuntoelae, om die skoolverlatingskoers te verminder. Dit sal ook verseker dat die skoolvoedingskema leerders tot by matriek dek.
"Boonop moet die onderwysstelsel herstruktureer word sodat uitnemendheid erkenning kry en gewaardeer word, en swak prestasie uitgeroei word."

Sterk stappe is nodig om skole wat glad nie werk nie, te konfronteer. Onder meer sal die DA 'n enkeldoelige taakspan skep om nie-werkende skole reg te ruk, 'n mentorprogram instel en prestasieteikens stel.
Daar sal sterk op die bevrediging van die behoeftes van leerders met spesiale behoeftes klem gelê word.

Wat die befondsing van skoolopvoeding betref, sê hy die DA sal skole sonder skoolgelde steun.

"Met die toewysing van geld sal ons egter 'n formule toepas wat skole se prestasies meet, sodat skole wat gedurig uitmuntende resultate oplewer, 'n aansporing kry om dit te bly doen. Om arm ouers meer keuses te gee, sal elke skool 'n minimum persentasie van leerders wat nie skoolgelde betaal nie, moet aanvaar. 'n Landswye beursskema sal geskep word om die mees akademies belowende 350 000 leerders uit arm gesinne die kans te gee om 'n beter skoolopvoeding te geniet," sê Boinamo.

Desiree van der Walt, die DA se adjunk-woordvoerder oor onderwys, sê die DA sal probeer verseker dat Suid-Afrika binne vyf jaar tot 'n bykomende 25 000 onderwysers per jaar toegang sal hê, en dat elke kind deur gekwalifiseerde en toegewyde onderwysers onderrig sal word.
"Ten einde die aantal onderwysers in opleiding te verhoog, sal ons met universiteite saamwerk om satellietkampusse vir onderwyser-opleiding in afgeleë gebiede te skep, en volle studiebeurse instel vir kandidate van gehalte wat beloof om twee jaar lank in bepaalde minderbevoorregte gebiede onderwys te gee."

Dit is baie belangrik dat onderwysers hul vak behoorlik aan hul leerders moet kan oordra, en alle onderwysers sal gestandaardiseerde kennisbeoordelings in die vak wat hulle onderrig, moet skryf.
Salarisverhogings en bevordering sal ook daarvan afhang of dié toetse geslaag word.

Onderwysers moet ook aan 'n stelsel van gereelde individuele prestasiehersienings onderworpe wees. Dit is iets wat in die meeste ander betrekkings as vanselfsprekend aanvaar word.
"Prestasie en vaardighede sal 'n ewe aanvaarde deel van 'n onderwyser se salarispakket word as vir enige ander beroep."
Ten einde die kundigheid van onderwysers met skaars vaardighede meer breedweg te versprei, sal die DA die begrip van Meester-onderwysers instel. Dié sal 'n bepaalde vak waarin hulle besondere kundigheid het, by verskeie skole onderrig, sê sy.