|
Jes. 49:14 "Die Here het my verlaat, die Here
het my vergeet."
En dit tref almal – 'n gewone Christen soos ek
en jy, maar ook vir pastore en predikante; selfs
grotes soos Joyce Meyer, Angus Buchan en vele
ander.
Maar ons het ook hiérdie woestyntye in ons
lewens nodig. Ons is juis in hiérdie tyd nie
alleen en verlore nie. Dalk is dit so deur God
beskik?
Markus 1:11-13a "Daar was ook 'n stem uit die
hemel: 'Jy is my geliefde Seun. Oor Jou verheug
Ek My.' Net daarna het die Gees Hom weggevat die
woestyn in, waar Hy veertig dae lank gebly en
deur die Satan versoek is."
En soos wat dit met Jesus was, laat die duiwel
ons ook nie alleen nie. Hy versoek ons met
allerhande leuens. Hy laat ons verlore voel –
Godverlate. Daarom dat jy moet vasstaan in die
kennis wat jy het. Om 'n kind van God te wees,
is 'n diepe wete en nie 'n gevoel nie. Jy moet
jouself herinner aan God se beloftes, sy
alomteenwoordigheid en sy liefde vir jou. Jy is
nooit alleen nie – al voel dit so.
Jes. 41:10 "Moenie bang wees nie, Ek is by jou;
moenie bekommerd wees nie, Ek is jou God. Ek
versterk jou, Ek help jou, Ek hou jou vas, met
my eie hand red Ek jou."
Ek dink God neem ons soms na die woestyn omdat
Hy vir ons wil sê: "Stop my kind! Jy is te besig!
Raak rustig. Word stil. Kom soek my aangesig en
teenwoordigheid! Ek verlang na jou. Jy is besig
met goeie werk, maar nie met dit wat ek wil hê
jy moet doen nie."
Nou wonder ek: hoekom sal God dit nodig ag om
ons weg te voer na die woestyn? Is dit dalk
omdat . . . :
1.
ons so besig is met dinge van die Here, dat ons
ons tye mét Hóm afskeep?
2.
ons nie besig is met dit wat God se plan vir ons
is nie? God het 'n plan en doel met elkeen van
ons – 'n plan wat inskakel by Sy groter plan –
en as ons nie Sy pad loop nie, is dit tyd vir
Hom om ons te onttrek.
3.
God vir ons groter dinge in gedagte het en ons
wil voorberei. Ester, Johannes, Moses en selfs
Jesus is voorbeelde van persone wat woestyntye
beleef en deur God voorberei is op groter planne
wat Hy vir hulle gehad het.
Ps 37:7 "Daarom moet jy in stilte op die Here
vertrou."
Wanneer jy dus voel of jou geestelike prop
uitgetrek is, weet dat God besig is met jou.
Gebruik dié tyd vir selfondersoek. Doen 'n
voorraadopname van jou geestelike lewe:
ondersoek jou eie motiewe, rigting en doel in
die lewe. Vra jouself weer: "Wat is belangrik?"
en maak seker dat God die middelpunt van alles
is. Stel jouself onvoorwaardelik tot God se
beskikking en maak seker dat jy in tune
met Hom is.
Onthou ook: Jy mag dalk so voel omdat jy van God
weggedraai en weggestap het. Draai dan om en
stap terug na Hom wat jou met ope arms sal inwag
– Hy is nog net daar waar jy Hom gelos het!
|
