|
|
|
deur
Tilana Bester
e-pos die skrywer
|
|
Jy het nie tyd nie! Te besig om
tyd te maak vir Hom, die Gewer
van tyd? Maar wat as Hy nie tyd
het vir jou nie? |
|
|
|
|
Jesus gee jou elke dag 'n volle 24 uur. Daarmee
saam gee Hy aan ons 'n vrye wil om self te
besluit hoe ons hierdie tyd gaan aanwend. En ek
wonder vandag: Hoeveel van jou tyd sonder jy vir
jou Skepper en Verlosser af? Hoeveel tyd
spandeer jy aan dinge wat regtig belangrik is?
Tyd is altyd 'n issue – of sal ek eerder
sê: tyd is áltyd te min. Praat met enige persoon
en jy sal een of ander stadium hoor: "Ek het nie
tyd nie" of "tyd is geld". En omdat tyd so min
is, is ons gedurig besig om iewers tyd te sny.
Meeste van ons sny eerste aan tyd wat ons saam
met God moet spandeer. Ons sny aan ons gebedstyd,
ons Bybelleestyd, 'n erediens of biduur. Net
soos ons aan ons tiendes begin sny wanneer dit
lyk of ons begroting nie wil klop nie . . .
As ons met die mond bely dat God ons eerste
prioriteit is, moet dit in ons lewens sigbaar
wees. Ons moet dit uitleef! Jou tyd vir God is
belangrik. Dit is 'n offergawe aan die Here.
|
|
Ons tydoffer aan die Here moet sonder
gebrek wees – dit mag nie afskeeptyd
wees nie. Dit moet heilige, afgesonderde,
aanneemlike tyd wees.
Feit is, ons sal altyd besig wees. Tensy ons
gehoorsaam leef en God eerste stel, sal daar
altyd verskonings en redes wees om nie by dinge
van koninkrykswaarde uit te kom nie. God is baie
ferm en waarsku dat ons vir Hom tyd moet maak.
Dit is belangrik om deur Sy Woord en Gees
versterk en gevoed te word. Verstaan mooi . . .
as jy nie hiervoor tyd maak nie, sal jou lewe
altyd in chaos, ongelukkigheid, bitterheid,
hartseer, ensovoorts gedompel wees. Maar as jy
tyd saai, sal jy tyd maai. Maak seker jy oes nie
geestelike armoede nie! Wees verseker: As jy tyd
aan God afstaan sal Hy seker maak jy ontvang
genoeg tyd vir al die ander dinge wat ook
belangrik is.
Eendag gaan ek en jy voor die groot Regter staan
en ons gaan op Sy vraag moet antwoord: "My kind,
wat het jy met die tyd gemaak wat Ek jou gegee
het? Hoeveel daarvan het jy aan My afgesonder?
Hoeveel daarvan het jy spandeer om dit te doen
wat Ek van jou gevra het?" Wat gaan jou antwoord
wees? |
|
Matt 7:21 "Nie elkeen wat vir My sê:
'Here, Here,' sal in die koninkryk van
die hemel ingaan nie, maar net hy wat
die wil doen van my Vader wat in die
hemel is." |
|
|
Besef asseblief dat elke oomblik van elke dag 'n
genadegawe is. Dat tyd in die eerste plek nie
aan ons behoort nie. Dis geleende tyd. Dis tyd
wat die Vader aan ons gee om onsself voor te
berei op die ewige lewe. Offer vandag nog jou
tyd aan God en fokus jou aandag, krag en energie
op Hom en Sy koninkryk. En onthou . . . God het
altyd tyd vir jou!
Ter afsluiting, hier is 'n gediggie wat my nogal
diep geroer het:
Ek het gekniel om te bid, maar soveel het my te
doen gestaan,
dus was dit van korte duur.
Ek moes my na my werkplek haas, anders kon dié
aan wie ek iets skuld,
my aangluur.
Derhalwe het ek gekniel, gou 'n gebed gedoen;
en vinnig van my knieë opgestaan.
My Christelike plig was tog nou nagekom, so my
siel kon in rustigheid
weer voortbestaan.
Die ganse dag het die tyd ontbreek om 'n woord
van bemoediging teenoor iemand te spreek.
Geen tyd is gemaak om met vriende oor Christus
te praat – hulle kon met my die draak steek.
Geen tyd, geen tyd, te veel om te doen, dit was
my voortdurende klaaglied.
Geen tyd afgestaan aan siele in nood, maar
eindelik baie tyd:
dít wat die dood aan my bied.
Met neergeslane oë het ek voor die Here verskyn
en daar moes ek staan en bewe, want in Sy hand
het God 'n boek gehad:
dit was die Boek van die Lewe.
"Jou naam verskyn nie in my Boek nie," sê God
toe Hy met my spreek,
"Ek wou dit op 'n keer neerskryf, maar die tyd
daarvoor het
ontbreek."
-
Skrywer, onbekend
Gee asseblief aan God die tyd wat hom toekom.
Maak seker jy staan nie eendag beskaamd en
skuldig met trane in jou oë voor Hom nie.
|
|
Almagtige Vader,
vergewe my vir die kere wat ek so
skaamteloos tyd mors; wanneer ek sonder
om twee keer te dink besluit om 'n
erediens te mis, of nie Bybel lees nie.
Vergewe my vir elke kort skietgebed en
afskeeptyd wat ek probeer regverdig het.
Here Jesus, vandag offer ek my tyd aan
U. Ek wil pleit dat U deur U Gees my
daagliks sal herinner dat tyd 'n
genadegawe is en dat elke minuut
eerstens aan U behoort. Help my om tyd
ryklik in U koninkryk te saai sodat ek
eendag onbeskaamd voor U kan staan. In
Jesus Naam, Amen. |
|
|
