joumenswees

Mans bo 40 sukkel in die bed

Erektiele disfunksie is een van die mees algemene seksuele bekommernisse vir mans oor die ouderdom van 40. Dit kan probleme in verhoudings veroorsaak, asook 'n man se selfbeeld negatief beïnvloed. Tog is dit belangrik vir paartjies om te weet dat ED 'n algemene mediese probleem is en dat daar wel oplossings daarvoor is.

Deur Leandie Buys

Erektiele disfunksie (ED) is die onvermoë om 'n ereksie te kry, of te behou, wat hard genoeg is vir penetrerende geslagsgemeenskap.
Dis nie 'n siekte nie, maar eerder 'n simptoom van 'n ánder onderliggende probleem, wat fisiek of sielkundig, of 'n kombinasie van die twee kan wees.
ED moenie met 'n lae libido – wat na 'n lae seksdrang verwys – of die onvermoë om 'n orgasme te kry of te ejakuleer verwar word nie.
Oorhaastige ejakulasie is wel soms 'n sekondêre probleem van ED, maar dit kan ook andersom wees. Die eerste stap tot behandeling is om uit te vind watter probleem eerste voorgekom het.

Die feite
* Volgens Australiese studies sal 1 uit 5 mans bo die ouderdom van 40, erektiele probleme ondervind, en vir 1 uit 10 van dié mans sal dit onmoontlik wees om ereksies te kry.
* Omtrent 40% van alle mans oor 40, 50% van alle mans oor 50, 60% van alle mans oor 60 en 70% van alle mans oor 70 het by tye probleme met hul ereksies.
* Mans oor 30 benodig dikwels meer fisieke stimulasie voordat hulle 'n vol ereksie kan bereik. Dis as gevolg van verminderende testosteroonvlakke in die liggaam, wat die gevolge van ouerwording is.
* 'n Ferm, harde ereksie is geensins 'n verpligting vir bevredigende seks nie: Penetrasie is moontlik sonder 'n vol ereksie en is dikwels net so bevredigend.
* Meeste mans verloor hul vol ereksie tydens die liefdespel, en benodig dan ekstra fisieke stimulasie om weer hard te word.

Oorsake

Daar is verskeie oorsake van ED, maar dit is dikwels die gevolg van 2 of 3 gemeenskaplike faktore. Fisieke probleme is ongeveer 85% van die tyd die oorsaak van ereksie-probleme, terwyl dit net 1 uit 10 kere as gevolg van sielkundige probleme voorkom.

Ernstige gesondheidsprobleme
Diabetes, hoë bloeddruk, vetsug, kroniese nierversaking, hoë cholesterol en slaapapnee word almal met erektiele disfunksie verbind.

Medikasie, alkohol en dwelms
Sigarette, alkohol- en dwelmmisbruik en sommige medikasie (vir bloeddruk, cholesterol, depressie, sielkundige afwykings en prostaatkanker) kan ook die oorsaak van ED wees.

Psigososiale probleme
Hieronder val prestasie-angs, verhoudingsprobleme, spanning by die werk en finansiële druk, depressie, seksuele ingesteldheid en opvoeding, asook psigiatriese probleme. Psigososiale probleme wat ED veroorsaak moet deur 'n professionele seksuoloog behandel word.

Neurologiese siektes
Toestande soos Alzheimer's en Parkinson's beïnvloed senuweefunksies wat tot ED kan lei.

Erektiele disfunksie en oudword

Erektiele disfunksie is een van die mees algemene seksuele bekommernisse vir mans oor die ouderdom van 40. Dit kan probleme in verhoudings veroorsaak, asook 'n man se selfbeeld negatief beïnvloed. Tog is dit belangrik vir paartjies om te weet dat ED 'n algemene mediese probleem is en dat daar wel oplossings daarvoor is.

Soos ons ouer word, vind daar veranderinge in ons liggame plaas. Mans se testosteroon verminder en hul spiere, insluitend die spiere in die seksuele organe, word swakker. Mans se vaskulêre en neurologiese stelsels neem langer om te reageer, dus is visuele stimulante nie meer so effektief soos as wat dit voorheen was nie.

Om vir die veranderings wat veroudering meebring te kompenseer, moet seksuele opwekking meer op ontspanning en plesier fokus. Meer fisieke stimulasie en seksuele-voorspel help verder ook om die intimiteit en genot van seksuele aktiwiteite vir ouer paartjies te vermeerder.

Orale medikasie, soos Viagra, Cialis en Levitra, is baie effektief vir ED by ouer mans.

Behandeling

Wanneer 'n man erektiele disfunksie ervaar, is dit belangrik om vir 'n volledige en omvangryke mediese ondersoek te gaan, aangesien ED ook 'n teken van erger kwale, soos hartsiektes of diabetes, kan wees. Daar is verskeie behandelings vir ED, en meeste mans moet eksperimenteer om uit te vind wat die beste vir hulle werk. Dié behandelings sluit in:
* Orale medikasie: PDE5 inhibitors, ook bekend as Viagra, Cialis en Levitra, toon positiewe resultate by meer as 70% van mans wat ED ondervind. Dis een van die minste inhiberende behandelings vir erektiele disfunksie aangesien dit nie die spontaneïteit uit die liefdespel wegneem nie.
* Vakuum-ontwerpe: Wanneer dit oor die penis gesit word, sal die apparaat die bloedsomloop na die penis verhoog, wat 'n normale ereksie namaak.
* Inspuitings: Dit verhoog die bloedsomloop na die penis. Hierdie inspuiting word as baie effektief beskou en werk tot 98% van die tyd. Dis normaalweg pynloos en is binne 10 minute effektief. Inspuitings kan ook die tydsduur van die ereksie beheer. By minder as 1% van gevalle kan die inspuiting egter priapisme – 'n ereksie wat pynlik is en ure lank aanhou – veroorsaak.
* Hormoonterapie: Dit word net vir mans gebruik wie se sekshormoonvlakke, soos testosteroon, baie laag is, alhoewel dit nie 'n algemene oorsaak van ED is nie.
* Prostetiese penis-inplantings: Hierdie word gewoonlik as 'n laaste uitweg beskou, en slegs as al die ander behandelings oneffektief was.
* Mans wat aan ED weens psigososiale probleme ly, moet deur 'n professionele seksuoloog behandel word wat die oorsprong van die probleem sal probeer vasstel. Dis veral belangrik vir diegene wat fisieke of seksuele mishandeling deurgemaak het, of wat angs en druk tydens seks ervaar.

ED en jou verhouding

Praat oor jou seksuele probleme met jou maat. Geen man hoef skaam of verleë oor ED te wees nie – dit is 'n algemene seksuele probleem by mans bo die ouderdom van 40. Erektiele disfunksie affekteer beide partye in 'n verhouding. Kommunikasie oor ED is die sleutel, en as dit reg hanteer word, kan dit ook die intimiteit in die verhouding verbeter. Dis belangrik dat albei persone in die verhouding die simptome van ED erken en hul daaraan toewy om dit saam te bowe te kom.

'n Man wat nie bevredigende geslagsgemeenskap kan hê nie, kan nogtans 'n sterk seksdrang hê, wat erg frustrerend kan raak. As dit nie behandel word nie, kan ED 'n man se selfbeeld negatief beïnvloed wat die kommunikasie en intimiteit in die verhouding agteruit sal laat gaan.

Vrouens raak dikwels baie ontsteld wanneer hul maat ereksie-probleme het. Dikwels blameer hulle hulself en dink dit is omdat hulle nie begeerlik genoeg is nie, of vermoed, verkeerdelik, dat hul maat 'n affair het. ED is meesal verwant aan 'n fisieke probleem, en hou geen verband met hoe 'n man oor sy maat voel nie.

Mans voel dikwels skaam en skuldig omdat hulle nie hul maat seksueel kan bevredig nie. Nogtans, om ED nie aan te spreek nie en nie behandeling daarvoor te kry nie, kan tot prestasie-angs en ander sielkundige probleme lei wat dit net kan vererger.

Soms blameer vroue hul maats vir ED, en wil glad nie deel van die oplossing wees nie. Tog is dit baie belangrik dat vroue betrokke moet wees om hul maat te help om ED te oorwin. Wanneer beide betrokke is, help dit om die intimiteit van die verhouding te versterk en oplossings kan baie vinniger gevind word.

Onthou: seksuele intimiteit is 'n vorm van kommunikasie. Wanneer 'n paartjie oor hul seksuele verhouding praat, help dit om spanning en angs in beide maats te verlig, en dit vermeerder fisieke en emosionele intimiteit. Te danke aan moderne medisyne en met die samewerking van beide maats is dit moontlik om 'n vervullende sekslewe te hê, ongeag jul ouderdom.

Leandie Buys is 'n kliniese seksuoloog en traumaberader. Kontak haar by 041 373 5800. Jy kan ook 'n faks stuur na 086 517 2107 of 'n e-pos na info@leandiebuys.co.za.
Om haar maandelikse nuusbrief te ontvang, besoek www.leandiebuys.co.za.