|
Matt 7:13:
"Gaan deur die nou poort in. Die poort wat na
die verderf lei, is wyd en die pad daarheen
breed, en die wat daardeur ingaan, is baie. Maar
die poort wat na die lewe lei, is nou en die pad
daarheen smal, en die wat dit kry, is min."
Hierdie smal pad is die pad van gehoorsaamheid.
Dit is wanneer jy alles begin meet aan hemelse
standaarde; wanneer God se opinie belangriker is
as enige ander, en wanneer jy God ten alle koste
wil behaag en nie mense nie! Elke keuse wat jy
elke dag neem bepaal jou gehoorsaamheid. Dit is
'n voortdurende proses van heiligmaking en
reiniging.
Rom 12:1 - 2:
"Gee julleself aan God as lewende en heilige
offers wat vir Hom aanneemlik is. Julle moenie
aan hierdie sondige wêreld gelyk word nie, maar
laat God julle verander deur julle denke te
vernuwe. Dan sal julle ook kan onderskei wat die
wil van God is, wat vir Hom goed en aanneemlik
en volmaak is."
Die smal pad kan ook vergelyk word met 'n
4x4-roete. Ek is seker baie sal saamstem dat die
4x4-roete, of dan liewer die smal pad, 'n pad
van opwinding is! 'n Pad wat ons na die
interessantste plekke lei! Op hierdie pad sal jy
die glorie van God sien en ervaar; in Sy
skepping sal jy Sy grootheid besef; in Sy soete
teenwoordigheid sal jy Sy wonderwerkende krag
beleef! Op hierdie pad sal jy rus vind in groen
weivelde en drink uit strome met Lewende water.
Elke dag op hierdie pad is 'n avontuur! En enige
4x4-entoesias sal ook weet dat jy nie die pad
alleen aandurf nie. Jy maak seker jy neem iemand
saam wat jou kan help as jy in die moeilikheid
is. Daarom is ondersteuning en bemoediging in 'n
geloofsgemeenskap so ongelooflik belangrik. Jy
kan maklik afdwaal, verdwaal of in die
moeilikheid kom sonder dat daar iemand is om jou
te help. Ons kan nie die pad alleen stap nie!
Wanneer ons as kinders van God hiérdie pad van
gehoorsaamheid stap, sal ons aan ons vrugte
geken word.
Gal 5:22 - 23:
"Die vrug van die Gees, daarteenoor, is liefde,
vreugde, vrede, geduld, vriendelikheid,
goedhartigheid, getrouheid, nederigheid en
selfbeheersing."
Ons sal borrel en aan ander die liefde van Jesus
verkondig. Ons liggies sal helder skyn; ons sal
die donker wêreld verhelder en mense na die Lig
lei. Ons sal nie met 'n doodgewone lewe, waar
Jesus net 'n bysaak is, tevrede wees nie. Hy sal
ons alles wees – die spil waarom alles draai!
Die Bybel en elke woord daarin sal ons
rigtingwyser en padkaart word en ons sal dit
gehoorsaam volg.
Maar wanneer ons kortpaaie kies en die Padkaart
ignoreer, sal ons ongelukkig die gevolge daarvan
moet dra.
Matt 3:10:
"Die byl lê al klaar teen die wortel van die
bome. Elke boom wat nie goeie vrugte dra nie,
word uitgekap en in die vuur gegooi."
Mag elke leser van hierdie eenvoudige
boodskappie vandag besluit om Jesus gehoorsaam
te volg. Maak seker jy is op die smal pad!
Open 3:16:
"Ek weet alles wat julle doen. Ek weet dat julle
nie koud is nie, en ook nie warm nie. As julle
tog maar koud of warm was! Maar nou, omdat julle
lou is, nie warm nie en ook nie koud nie, gaan
Ek julle uit my mond uitspoeg!"
|
