|
|
|
deur
Wilna Myburgh
|
|
Moenie dat die herfsblare, en
later die leë takke, die enigste
kleur aan jou wintertuin verskaf
nie – maak nóú reeds gereed om
kleur in jou tuin te kry. 
|
|
 |
|
Wanneer dit lente word, skarrel almal rond om
hul tuine reg te kry en die kwekery te oorval om
plantjies te kry om hul tuine mooi en kleurvol
te maak. Maar het jy ooit besef dat Maart-maand
ook 'n goeie tyd daarvoor is? Dis net die regte
tyd wanneer jy gereed moet maak om jou plante
vir die winter reg te kry, bolle te plant en
wintergroente aan te plant. Dit is ook 'n
uitstekende manier om die wegkwynende hitte van
die son te geniet deur die tyd buite te spandeer.
As jy 'n kleurvolle wintertuin wil hê, begin
sommer vandag beplan en plant. Al het jy 'n
klein tuin of net 'n balkon – begin om bolplante
in potte te plant. Eenjarige plante gee ook
kleur aan enige vaalkol in jou tuin of balkon.
Bokbaaivygies en Namakwalandse daisies is twee
blomme wat maklik gesaai en onderhou kan word.
Nog 'n manier om kleur te kry is deur
pronkertjies te plant.
Begin eers deur die somerblomme wat klaar geblom
het, uit te haal en om die grond vir die
winterblomme gereed te kry. As daar nog plante
is wat blom, kan jy net die dooie blomme afpluk.
Gee dit gereeld water en jy sal nog een sarsie
blomme uit die plantjies kan kry. Wanneer jy na
dié blomme omgesien het, kan jy kompos en 2:3:2
kunsmis in jou grond inwerk.
Die beste raad wat ek kan gee is dat jy na jou
kwekery toe moet gaan – hulle kan jou sê presies
watter blomme en plante in jou klimaatstreek
gaan inpas. In streke wat baie ryp kry, moet jy
veral kieskeurig wees oor wat jy plant. En dit
sal heeltemal ander plante wees as vir 'n
winterreënvalstreek. |
|
 |
Groente
Moenie ophou om jou groente nat te gooi, net
omdat jy dink die winter is naby nie. Die laaste
somergroente kan nog gebruik word. Groente wat
nou geplant kan word, is wortels, radyse,
ertjies, beet, beetspinasie (chard),
brokkoli, blomkool, kool, Chinese kool, seldery,
preie en blaarslaai. Gedurende die winter benodig jou groentetuin veral son, so maak seker
dat jy jou groentetuin maak waar daar tussen
vier en vyf ure sonlig per dag is. Die
groentetuin moet ook nie in die skadu van 'n
gebou of groot boom wees nie. Gereelde bemesting
en onkruidverwydering sal help om jou
groentetuin mooi te hou. |
|
 |
Kruie
Kruie benodig ook 4 -5 ure sonlig 'n dag en moet
van koue winde weggehou word, veral as die grond
nat is. 'n Goeie manier om jou kruie veilig te
hou is om dit in potte te plant en te skuif om
hulle so beskut te hou. Gee kruie net een tot
twee keer water per week in die winter,
verkieslik in die oggend. Geharde kruie is die
enigste wat die winter oorleef – dis kruie soos
tiemie, oregano, marjolein, pietersielie, kerwel
en salie. Salie hou net gewoonlik nie die hele
winter deur nie. |
|
 |
Struike
Gee jou struike minder water in die wintermaande.
As jy in 'n warm, droë klimaatstreek bly, is een
keer elke drie weke voldoende. Azaleas en
kamelias het egter spesiale versorging nodig –
gee nog genoeg water, veral as dit nog warmerig
is en plaas 'n deklaag, byvoorbeeld dennenaalde,
rondom die plante vir beskerming. |
|
 |
Rose
As jy woon waar daar droë winters is, gee rose
een keer 'n week water. Twee eetlepels 3:1:5
rondom die stam sal help om nuwe groei te
bevorder in die winter. Ongeveer 75 g Engelse
sout en gereelde blaarvoedsel sal ook die rose
gelukkig hou. Spuit rose vir meeldou en swartryp
as dit nodig blyk. |
|
 |
|
Bolle
Die beste tyd om bolle te plant is tussen Maart
en Mei. So word hiasinte in Maart geplant,
terwyl tulpe eers in Mei geplant word. Die
pakkie waarin jy die bolle koop, gee al die
belangrike inligting, soos wanneer om te plant,
waar om te plant en hoeveel water benodig word.
Meeste bolle hou van son, maar sal ook gebreekte
skadu vir 'n gedeelte van die dag kan hanteer.
Kammetjies (freesias), ranonkels en Hollandse
irisse moet teen ryp beskerm word en verkieslik
in 'n beskutte bedding geplant word. Om bolle
teen ryp te beskerm, kan jy die beddings voor
sonop water gee om van die ys van oornagryp
ontslae te raak, of die bedding met skadunet of
hessian te bedek.
Omdat bolle tot 3 maande neem om te blom, kan jy
solank jou blombeddings kleurvol hou deur
eenjariges bo-op die bolle te plant. Blomme,
soos gesiggies, viooltjies en alyssum, lyk nie
net mooi nie, dit bied ook beskerming in die
vorm van 'n deklaag wat die grond vogtig en koud
hou en onkruid weghou.
|
|
