Kuier buite – in stylvolle gemak jouleefstyl hoofinhoud terug na jouleefstyl volgende artikel vorige artikel deur Wilna Myburgh   Beplan, sit en toets eers – kies dán vir jou 'n tuinstel volgens jou behoeftes. Doen dit só. Tydens die somervakansie spandeer 'n mens baie meer tyd buite as gedurende die res van die jaar – dit is ook dan wanneer jy ontdek dat jou tuinmeubels nie meer in so 'n goeie toestand is as wat jy gedink het nie. Of, dalk het jy nie eens tuinmeubels nie! Deesdae is tuinmeubels hoogmode en daarom is daar 'n magdom verskillende meubelstukke om van te kies. Hoe om te kies Die belangrikste ding om te onthou is dat die koop van tuinmeubels nie veel verskil van die aankope van enige ander meubels nie. Jy moet ook in ag neem dat dit by jou behoeftes moet pas, en gemaklik en duursaam moet wees. Hier is 'n paar riglyne om jou te help wanneer jy nuwe tuinmeubels aanskaf: ● Waar wil jy sit? Al wat jy hier hoef te bepaal, is wat dit is wat jy met die meubels wil doen: Onthaal jy dikwels en het 'n mooi, gemaklike  buite-eetstel nodig? Of wil jy sommer net luilekker terugsit? Dan moet jy ook dink waarvan jy hou: 'n meer tradisionele houtstel of 'n ultramoderne geweefde- of aluminiumstel? Voor jy koop moet jy ook seker wees van waar die meubels gaan staan – hoeveel spasie het jy en gaan die meubels onderdak gehuisves word? ● Staan op en doen navorsing Die tipe materiaal wat jy kies gaan bepaal hoeveel tyd jy aan die onderhoud daarvan moet spandeer. Kyk na die voor- en nadele van elke tipe meubelstuk, kanselleer dan dié uit wat nie in jou smaak val en nie aan jou behoeftes voldoen nie, en konsentreer dan op die meubels van wie se kenmerke jy hou. Houtmeubels Die heel beste eienskap van hout is dat dit nie te warm in die somer, en ook nie te koud in die winter, is nie. Dis nie soos 'n staalstoel wat jou vinnig sal laat opspring as hy vries in die winter of wat jou in die somer brand nie! Hout is stewig vas op die aarde – wat 'n goeie eienskap is omdat dit duursaam is, maar ook 'n slegte eienskap is aangesien dit swaar is. As jy houtmeubels koop moet jy vooraf beplan waar dit gaan staan: jy kan dit nie skuif soos die skaduwee verander nie. Dis ook nie maklik om dit te stoor nie – dit staan waar dit staan! Daar is baie soorte hout om van te kies. Jy kan dit stain, olie gee of verf, afhangend van hoe jy dit wil laat lyk. Sommige soorte hout is van nature weerbestand. Die mees populêre hout is kiaat, afkomstig van Indië, Burma en Thailand, wat bekend is vir sy duursaamheid en weerbestandheid. Wanneer dit onbeskerm gelaat word, sal dit vanself 'n silwergrys kleur aanneem. As jy dié hout se natuurlike goudbruin kleur wil behou, moet jy dit jaarliks afskuur en olie gee. Wees net versigtig – as kiaatmeubels baie goedkoper is as hul eweknieë, is dit dikwels omdat dit van dun stukkies hout gemaak is en nie so lank gaan hou as wat jy verwag nie. Dié winskopie kan maklik in 'n gat-in-die-sak-kopie verdraai. Sederhout is ook 'n goeie keuse aangesien dit, net soos kiaat, bestand is teen verwering. Dit het boonop 'n insek-afwerende reuk. Dan kan jy ook ander houtsoorte, soos sipres, boekenhout en mahoniehout oorweeg. Die Panthera-reeks by Wetherlys is van plantasie-kiaat en is baie duusaam en gemaklik. Plastiekmeubels Die grootste oorweging om plastiekstoele te koop, is die feit dat hulle maklik op mekaar gepak en gestoor kan word. Verder is dit ook die heel maklikste meubels om skoon te maak – spuit dit af met water en siedaar! Maar nou ken ons ook almal plastiekmeubels – dit lyk meesal maar net so goedkoop soos die goedkoop prys wat jy daarvoor betaal. Daar is natuurlik ook dié meubels wat van herbenutte plastiekbottels gemaak word en soos houtmeubels "lyk". Maar alhoewel dit goed vir die omgewing is, kos dit dikwels dieselfde as meubels van regte hout.   Rottangmeubels Rottangmeubels het maar onlangs weer populêr geraak – as buite-meubels. Daar is ontsettend baie verskillende vorms, kleure en handelsname beskikbaar. Anders as wat mense dink, verwys die woord "rottang" (wicker) nie na 'n spesifieke materiaal nie, maar na die tegniek wat gebruik word om riete te sny en om 'n raam te weef. Rattan-meubels, wat ook in Afrikaans as rottang bekend staan, verwys na spesifieke meubels wat van 'n soort bamboes, ook spaansriet genoem, gemaak word. Natuurlike rottang sal deur direkte sonlig en reën beskadig word en moet dus liewer net op stoepe of beskermde areas gebruik word. Daar bestaan egter ook iets soos all-weather of all-season rottangmeubels, wat nes die naam sê, maar buite kan bly sonder 'n dak as beskerming. Dit word of van sintetiese materiaal gemaak wat om 'n aluminiumraam geweef is, of dis natuurlike rottangmeubels met 'n weerbestande afwerking. Voordele van rottangmeubels is dat dit lig is, en dus maklik rondgeskuif kan word nes jy lekkerkry. Dit gee dieselfde gevoel as "ordentlike" binnenshuise meubels en is, vir my, die toppunt van gemak. Maak seker jy weet wat die instruksies vir die versorging van jou meubels is. En – jy moet ook seker maak dat die stoelkussings weerbestand is, of jy moet dit in die huis stoor as dit te sonnig of nat is. As jy van 'n klassieke look hou, is Wetherlys se Cuba-reeks net die ding vir jou. Die reeks is op vintage colonial wicker-ontwerpe gebaseer en het die diepbruin kleur van 'n Havana-sigaar, of donker sjokolade, afhangend van jou voorkeur! Metaalmeubels – aluminum of yster Aluminium is beslis 'n goeie keuse – dis duursaam, lig en roesvry. Met duursaam bedoel ek nou dat die waarborg tot so lank as 15 jaar kan strek. Dit lyk baie soos meubels van ander metale, maar is gelukkig nie so 'n goeie geleier van hitte of koue nie. Dit het ook nie baie versorging nodig nie – was dit net met water en skoonmaakmiddel of vee dit met 'n lap af! Staal- en gietystermeubels word gebou om te hou! Om roes te voorkom moet dit geverf word. Wanneer dit reën kan jy die meubels bedek en dan net weer die bedekking afhaal sodat daar nie binne kondensasie vorm wat roes veroorsaak nie. Dit kan in allerhande verskillende vorms gemaak word om by jou styl aan te pas. Al wat nog teen dit tel is dat dit so swaar is om rond te dra . . . maar net soos met houtmeubels, is dit nie 'n probleem as jy 'n permanente staanplek daarvoor het nie. Meng-en-pas-meubels Is jy nou so deurmekaar soos hoendersop? Dalk moet jy dit oorweeg om meubels van gemengde materiale te koop. Dit is glad nie nodig dat jou tafelblad uit dieselfde materiaal as die tafelpote moet wees nie. Tafelblaaie uit marmer, teël, gepoleerde sement, graniet of enigiets waaraan jy kan dink, kan gemaklik op 'n staal- of houtraamwerk rus. So kan jy ook stoele met 'n staalraamwerk kry met 'n gemaklike materiaalsitplek, of met 'n houtraamwerk en 'n rottangsitplek. Jy kan nog verder gaan en kiaatstoele om jou leikliptafel pak . . . meng en pas verskillende materiale totdat jy kry wat jou hart begeer!   Die Baltimore-reeks van Wetherlys, wat die beste kwaliteite van roesvrye aluminium, hars en Petan weave saambring, is maklik om te versorg. ● Moenie net daar sit nie – gaan winkel toe Dis belangrik dat jy navorsing doen voor jy koop om 'n idee van meubelpryse te kry. Dan kan jy so rofweg 'n begroting uitwerk en kan dit dalk ook help om jou keuse in 'n rigting te dwing. Gaan kyk by verskillende winkels – moenie net by die eerste die beste winkel koop nie. 'n Spesifieke reeks meubels word dikwels by meer as een winkel aangehou met merkwaardige prysverskille. ● Sit jy gemaklik? As jy tuinmeubels soek, is dit tog vanselfsprekend dat jy baie tyd buite wil spandeer. Daarom is dit belangrik dat die meubels wat jy koop so gemaklik as moontlik is. Toets die meubels – as jy kort is, soos ek, gaan jy 'n stoel met 'n kort sitplek wil hê, anders kom jou bene nie die grond by nie! ● Sit – in die winkel! Terwyl jy nou op jou voornemende meubels sit om dit vir gemak te toets, is daar nog 'n paar goed waarvoor jy op die uitkyk moet wees. Moet nou nie té wild wees nie, maar dis altyd 'n goeie idee om die tafel of stoele te wikkel om te sien of hulle stewig is. 'n Bietjie beweging is geen probleem nie, maar dit moenie lyk asof dit uitmekaar kan val nie. By houtmeubels, veral, moet jy na die lasse oplet. Daar moenie gate wees waar die tafelpote die tafelblad ontmoet nie. Metaalmeubels se soldeerlasse moet glad en nie opmerklik wees nie. Laat jou hand oor die meubelstukke gly – dit moet glad wees. As die meubels geverf is, moet daar nie plekke wees wat misgeverf is of waar druppels verf gemors is nie. Daar moenie skerp punte of onafgeronde kante op metaalmeubels wees nie. Kyk veral onder die tafel na die randafwerking – dis dalk net daar wat jy 'n skraap op jou knie kan optel. Dit tel ook vir die onderkant van armleunings. Skroewe en moere wat gebruik is om meubelstukke aanmekaar te las, moet weggesteek wees of 'n omhulsel hê. As dit in die oopte is moet dit verkieslik uit vlekvrye staal wees wat nie sal roes nie. Die belangrikste is dat jy nie moet huiwer om vrae te vra nie. Jy is die "belangrike" persoon wat geld moet uitgee en met jou keuse moet saamleef.   Besoek Wetherlys se webwerf hier.
e-pos hierdie artikel druk hierdie bladsy uit het jy al vir ons nuusbrief ingeteken?	terug na jouleefstyl volgende artikel vorige artikel
Hosted By Afrihost.com - The Best Web Hosting Ever! [ jouapplous ] [ joufiksie ] [ jouhoofstories ] [ jougeskenke ] [ joukind ] [ joukontrei ] [ jouleefstyl ] [ joumenswees ] [ joupolitiek ] [ jourubrieke ] [ jouse ]