|
Paella is 'n dis wat sy ontstaan in die Spaanse
platteland in Valencia gesien het. Dit is
vernoem na die Spaanse woord vir pan, paella
en paellera in Valencia. Dit kom van die
Latynse woord, patella, af. Die
oorspronklike paella van Valencia is in die 18e
eeu van vars groente, rys, hoender, konyn, eend
en slakke gemaak – nie soos daar gewoonlik
aangeneem word dat dit seekos moet inhê nie.
Gemengde paella (die oorspronklike resep met
seekos by) en seekospaella is deur die
Spanjaarde aan die kus begin. Noudat daar totale
Babelse verwarring onder die Spanjaarde is, kan
ons maar elkeen ons eie gunsteling variasie van
paella maak. Hier is hoe ek daarvan hou –
hopelik sal dit geen Spanjaard in sy graf laat
omdraai nie!
Die rys aan die onderkant van die pan moet so
effens bros word, om 'n toasty
gekaramelliseerde geur te gee. Dit word die
socorrat genoem. Jy hoef nie regtig 'n
spesiale paella-pan te koop nie, dit werk ewe
goed in 'n kastrol – maar dis tog 'n nuttige pan
om in die kas te hê!
Maak genoeg vir 4 – 6 mense.
600 g hoenderborsstukke of varktjops, in
blokkies gesny of 8 hoenderdye- en boudjies
5 ml borrie
5 ml paprika, gerookte paprika indien moontlik
25 ml ligte olyfolie
sout, peper
50 ml olyfolie
1 groot uie
1 klein groen soetrissie
1 klein rooi soetrissie
5 tamaties
2 koppies rys
4 - 6 koppies hoender-aftreksel
½ ml saffraan (los op in die hoender-aftreksel)
1 pakkie (250 g) gemengde gevriesde seekos*
200 g steurgarnale (opsioneel)
2 hande vol ertjies (opsioneel)
1 klontjie botter
15 ml vars, gekapte pietersielie
suurlemoenwiggies
Hierdie is die tipe resep waar jy al die
bestanddele voor die tyd gereed kan kry. Daarna
staan jy luilekker by jou gaste en kook en lyk
ewe koel en kalm. Dis nou om van bewondering af
te dwing!
Meng die borrie, paprika, olie, sout en peper –
gooi dit oor die hoender of vark en laat staan
vir ten minste 20 minute voor gebruik.
Kry dan al die groente gereed:
Sny die ui en soetrissies in skyfies en gooi in
'n bak.
Sny dan 'n kruis in elke tamatie, gooi kookwater
oor en laat staan vir 1 minuut. Spoel af in
lopende, koue water totdat die tamaties koud is.
Haal die skille af en sny in klein blokkies. Hou
eenkant.
Meet die rys in 'n bak af. Hou eenkant.
Maak die hoender-aftreksel aan en voeg die
saffraan by.
As jy die ertjies wil insit gooi dit ook in 'n
bakkie, mens het die geneigdheid om dit aan die
einde te vergeet.
Verhit olie – bedek net die pan – en braai die
hoender- of varkstukkies bruin, nie gaar nie.
Haal uit en hou eenkant.
Braai die ui en soetrissies totdat dit ook bruin
begin raak.
Gooi die tamatieblokkies en rys by - meng en
braai vir 1 minuut.
Voeg nou 4 koppies hoender-aftreksel met
saffraan by. Bring tot kookpunt.
Die vleis en gemengde seekos kan nou terug in
die pan gaan. Meng alles.
Bedek die pan dig met foelie, of 'n deksel as
dit een het – en kook vir 20 minute voordat jy
kyk of die rys gaar is. Gooi nog
hoender-aftreksel by as dit nodig blyk. Dit kan
tot 30 minute duur vir die rys om gaar te kom.
Indien jy ertjies gebruik, voeg dit by vir die
laaste 3 minute.
As jy steurgarnale insit: Begin ongeveer 20
minute nadat die rys begin kook het om die
steurgarnale in 'n aparte pan te braai. Voeg 'n
klontjie botter en bietjie olyfolie by en braai
totdat hulle gaar en pienkerig word. Sprinkel
die sap van 'n halwe suurlemoen oor en geur met
sout en peper. Strooi 15 ml gekapte pietersielie
oor. Wanneer die paella gaar is – skep die
geurige steurgarnale bo-op.
Sit voor met suurlemoenskywe en, veral as jy
baie gaste het, 'n vars brood. Die
broodvlegsel-resep met vars kruie,
suurlemoenskil en mozzarellakaas in die
Oktober-uitgawe van jouwêreld
is absoluut heerlik saam met die paella.
*Seekos: Koop pakke gemengde seekos, of kies
twee of drie van jou gunsteling seekossoorte.
Mossels en garnale of steurgarnale is
byvoorbeeld heerlik op hul eie. Jy kan ook die
hoeveelheid aanpas, soos jou smaak verlang.
|
