|
|
|
deur
Wilna Myburgh
E-pos die skrywer
|
|
Ontbyt is die belangrikste
maaltyd van die dag, maar ook
die een waarmee mense die meeste
sukkel! Daar is egter geen
verskoning dat dit
verbeeldingloos hoef te wees nie
– kikker dit op met kleur en
geur met ons 7 unieke resepte. |
|
|
 |
 |
 |
 |
 |
 |
 |
|
Ontbyt ís sekerlik die belangrikste
maaltyd van die dag. Sou die Engelse
daar in 1463 verkeerd gewees het toe
hulle die woord "breakfast" gemaak het?
Dit beteken tog letterlik "breek die
vas" – menende dat jy die nag van vas
moet stop deur te eet. En dis presies
hoekom jy ontbyt móét eet . . . om die
vas te stop en die liggaam weer "wakker"
te maak vir die dag wat voorlê.
Tog is dit die ete waarmee mens die
meeste sukkel. Vroeg in die môre het ek,
net soos baie ander mense, mos geen
wilskrag of inisiatief om te besluit wat
om voor te berei nie!
Maar hier is 'n paar idees – 7 resepte
om presies te wees! Jy kan elkeen op sy
eie maak, of kombineer: Maak byvoorbeeld
die roosgegeurde vrugteslaai in kleiner
bakkies en bedien dit as 'n voorgereg
voor een van die ander keuses. Die
kruiemuffins kan weer met koue vleis,
kase en vars vrugte voorgesit word.
Hulle wissel mekaar af van eenvoudig maar
gesond, na meer kompleks tog begeerlik. Hou
dit dan ook maar so in jou agterkop dat
ontbyte eintlik ‘n
wonderlike maaltyd is om aan te bied as
jy vriende of familie vir ete wil
oornooi. Dis boonop goedkoper as aandete
– aangesien jy baie minder vleis en kos
nodig.
Geniet dit hierdie maand om elke oggend
die vas te breek! |
Ons 7 ontbyt-resepte vir die maand is:
Geurige
soetrissie-roereierpakkies met avokado
en suurroom
Kruiemuffins
Eierbrood-ham-en-kaas-toebroodjies
Roosgegeurde
vrugteslaai met granola en joghurt
Uitsmijter
Nektarien-, kaneel-
en heuninghawermout
Omelet met gerookte
salm en avokado-suurroom |
|
|
Geurige
soetrissie-roereierpakkies met avokado en
suurroom
Maak genoeg vir 4 persone.
Hierdie ontbyt, met sy
spicy roereier in tortillas met avokado en
suurroom, toon so ‘n effense Meksikaanse-neiging.
Maak dit so "warm" as wat jy daarvan hou, die
avokado en suurroom dien mos as verkoelers. Jy
kan ook 'n vars rissie kap en saam met die
groente braai. Dié kan jy maklik vir gaste vir
ontbyt maak. Laat elkeen sy eie pakkie maak.
Gerasperde Cheddarkaas om ook in die pakkie te
sit, is heerlik! |
|
6 eiers
50 ml melk
5 ml mielieblom (Maizena)
5 ml varsgekapte Italiaanse pietersielie
of koljander (opsioneel)
1 mediumgrootte ui, fyngekap
1 mediumgrootte rooi soetrissie, in
klein blokkies gekap, so groot soos die
uie
15 ml ligte olyfolie
5 ml Ras el Hanout of 2.5 ml ligte
kerriepoeier en 2.5 ml borrie
gedroogde rissies (opsioneel)
sout en varsgemaalde swartpeper
4 tortillas of wraps (verkieslik
nie die heel groottes nie, of is jy só
honger?)
1 avokadopeer
15 ml suurlemoensap
nog sout en varsgemaalde swartpeper
suurroom |
 |
|
|
Braai die gekapte ui en soetrissie in die olie
vir 7 tot 10 minute. Maak seker die braaipan is
groot genoeg om later die 6 eiers te akkommodeer.
Voeg die Ras el hanout by, maal gedroogde
rissies oor. Bepaal maar self hoeveel jy van
brandgoed hou! Geur met sout en peper.
Jy kan gou die eiermengsel en avokado regkry
terwyl die groente braai.
Meng die melk sluk-sluk by die mielieblom in
sodat dit nie klonte vorm nie. Gooi dit by die
eiers en klits alles saam.
Gooi die eiermengsel by die groente in die pan
en roer voortdurend oor hitte totdat die eier
net-net gaar is. Hou in gedagte dat die eiers
nog gaar word nadat jy dit van die hitte af
verwyder het.
Maak die avokado: Druk die avokado fyn en geur
dit met sout, swartpeper en suurlemoen.
Maak nou die tortillas of wraps warm, jy kan dit
in foelie toedraai en 5 minute by 180 °C in die
oond "bak" of in 'n vadoek toedraai en vir 30
sekondes in die mikrogolf plaas.
Daar is 2 manier waarop jy die pakkies kan maak:
Skep die gegeurde roereier op een kwart van die
tortilla en vou dan in kwarte. Of skep die
roereier in die middel, laat ongeveer 5 cm oop
aan die onderkant. Vou dan die 5 cm-stuk oor die
eier en vou dan die kante om. As dit
uitmekaarval kan jy 'n tandestokkie strategies
indruk om dit vas te hou tot jy eet.
Skep voor opdiening die avokado en suurroom bo-op
die pakkie en bedien nog on the side vir
die eters om hulself te help.
|
|
Kruiemuffins
Maak 15 muffins
Muffins is wonderlik vir ontbyt. Jy kan dit die
vorige aand maak en dan saam met die kinders
skool toe stuur, saam werk toe vat, of sommer
deur die dag eet. Die ding is, mens is nie altyd
vir 'n soet muffin lus nie – en dis nou waar die
kruiemuffins die dag red! Kyk ook na die
variasies. |
 |
500 ml (2 koppies) koekmeel
15 ml bakpoeier
15 ml suiker
2 ml sout
30 g (125 ml) gemengde vars kruie (orego,
basiliekruid, salie, grasuie,
pietersielie), fyngekap
1 eier
250 ml (1 koppie) melk
100 ml gesmelte margarien of
sonneblomolie
Voorverhit oond tot 190 °C.
Meng die droë bestanddele in 'n groot
mengbak. Voeg die gekapte kruie by en
meng deur die meelmengsel. Klits die nat
bestanddele saam. Voeg dit by die droë
bestanddele en roer vinnig saam om deur
te meng.
Skep lepelsvol in muffinhouertjies – tot
¾ vol. Bak vir 15 minute. |
|
|
Variasies
Hierdie is 'n baie basiese kruiemuffin.
Vir kaas- en kruiemuffins: Voeg 100 g (250 ml)
gerasperde Cheddar by die droë bestanddele.
Vir kaas-, kruie- en songedroogde tamatiemuffins:
Voeg 100 g (250 ml) Cheddar en 8 tot 10 gekapte
songedroogde tamaties by die droë bestanddele.
Jy kan ook gekrummelde fetakaas byvoeg. Gaan
mal! Deel die deeg op en maak verskillende geure;
as jy dit gaan verdeel, gooi jou gekose
geurmiddel by nadat jy die nat en droë
bestanddele gemeng het.
|
|
Eierbrood-ham-en-kaas-toebroodjies
'n Gewone ham- en kaastoebroodjie word in eier
gedoop en gebraai totdat dit goudbruin is en die
kaas uitlokkend smelt. Die oorspronklike
Italiaanse weergawe hiervan word "mozzarella in
carozza" genoem, wat mozzarella in 'n wa /
voertuig beteken. Jy kan dit met doodgewone
brood maak en dan in driehoekies of vingertjies
sny nadat jy dit gebraai het, maar ek hou
daarvan om 'n Franse brood te gebruik – moet net
nie vir die Italianers daarvan sê nie. |
|
Franse brood
Ham, van jou keuse, of gebraaide spek
Mozzarellakaas (of ander kaas wat maklik
smelt)
2 eiers
sout en varsgemaalde swartpeper
15 ml gemengde vars kruie (orego,
grasuie, pietersielie, salie, ens.),
fyngekap
25 ml olie
Maak toebroodjies met die mozzarella,
ham en brood.
Klits die 2 eiers met 'n vurk. Geur met
sout en peper en voeg die vars kruie by.
Dis ook baie smaaklik sonder die kruie,
indien jy dit nie tot jou beskikking het
nie.
Bedek die bodem van 'n braaipan met olie
en verhit. Doop die toebroodjies vinnig
aan weerskante in die eier en plaas in
die pan. Wanneer dit goudbruin is aan
die onderkant, draai om. Jy kan dit so
bietjie met die eierspaan platdruk om te
verseker dat alles "jel". Loer of die
kaas gesmelt is - dan is dit gereed.
Sny die broodjies in vorms van jou keuse
en smul!
|
 |
|
|
Roosgegeurde vrugteslaai met granola en joghurt
Maak genoeg vir 2.
Die dag wanneer mense nie meer vrugteslaai eet
nie, gaan ek uit die lewe bedank. Die wonder is
dat mens dit regdeur die jaar kan eet, met 'n
verskeidenheid van vrugte wat jou gelukkig maak.
Met granola en joghurt by word dit 'n
substansiële ontbyt. En die rooswater en
roosblare gee dit 'n bietjie andersheid.
|
 |
250 g gemengde vrugte (soos papaja,
aarbei, piesang, nektariens)
15 ml heuning
5 ml suurlemoensap
5 ml rooswater*
blare van 1 roos (geen gif gespuit) (opsioneel)
60 g (100 ml) granola of muesli**
200 ml joghurt (vanielje of gewoon)
Sny vrugte in klein blokkies op en meng.
In 'n mikrogolfvaste bak of 'n klein
potjie meng die heuning en suurlemoensap.
Laat die heuning oor lae hitte loperig
word. Verwyder van die hitte en voeg die
rooswater by. Gooi die mengsel oor die
vrugte en meng deur. Skeur van die
roosblare in klein stukkies en voeg ook
by die vrugte.
Die lyk baie mooi as jy dit in lagies in
'n glas bedien. Maar, don't despair, ek
het nie 'n radar wat afgaan wanneer
iemand nog deur die slaap dit nie in 'n
glas bedien nie! |
|
|
Versier dit net vir die pret met 'n
roosblaartjie of twee.
*Jy kan natuurlik die hele roos-besigheid laat
staan, en dit met gekapte kruisementblare
vervang. Of met niks!
**Granola of muesli: Enige soort wat jy verkies
sal hier reg wees, met of sonder neute; met of
sonder vrugte. Probeer ook gerus daardie
snack mixes wat sade, vrugte en neute bevat
– dis heerlik!
|
|
Uitsmijter
Maak 4 broodjies; vir 2 of 4 persone.
Ontspan – uitsmijters het niks met uitsmyters
uit te waai nie. Hierdie is 'n Hollandse gereg,
wat jy enige tyd van die dag kan geniet. Terwyl
jy die eiers braai, smelt jy kaas bo-oor en eet
dit dan op 'n broodjie met ham. As jy haastig
(of lus) is, kan jy dit ook in 'n rolletjie maak
en soos 'n burger verorber. |
|
4 snye volgraanbrood
5 ml grasuie, fyngekap
5 ml aangemaakte / heelkorrelmosterd
15 ml smeermargarien
4 skywe ham
4 eiers
8 – 12 skyfies kaas met mosterdsaad,
kaas met komynsaad of Cheddar
sout en varsgemaalde swartpeper
Rooster die brood – net liggies. Dis
eintlik opsioneel.
Meng die grasuie, mosterd en margarien.
Smeer die brood met die gegeurde
margarien. Plaas 'n skyfie ham op elke
broodjie.
Verhit ongeveer 15 ml olie in 'n
braaipan om die eiers te braai. As die
wit net begin gaar word, sit skyfies
kaas bo-oor die hele eier. Geur met sout
en varsgemaalde swartpeper. Sit die
braaipan se deksel op (dan smelt die
kaas vinniger) en braai die eiers tot
hoe gaar jou mense daarvan hou.
Wanneer die eier gereed is, plaas dit bo-op
die hambroodjie. Geniet - verkieslik met
'n koppie koffie!
|
 |
|
|
Nektarien-,
kaneel- en heuninghawermout
Oat bran is die gekonsentreerde vesel wat in
hawermout voorkom. Dit het 'n lae glukemiese
indekswaarde en help met die absorpsie van
koolhidrate. Kikker die smaak met nektarien,
kaneel en heuning op. Jy kan gewone hawermout
ook gebruik vir die resep. |
 |
250 ml (1 koppie) water
90 ml oat bran (of hawermout)
knippie sout
knypie neutmuskaat
knypie kaneel
1 nektarien, sny in skyfies
5 ml heuning
melk of joghurt, om te bedien
Bring die water tot kookpunt. Gooi die
oat bran, sout, speserye en
nektarien by. Roer en kook vir 5 minute.
Verwyder van die hitte, sit die deksel
op en laat staan vir 5 minute.
Skep op en bedien met melk of joghurt en
nog heuning.
|
|
|
Omelet met
gerookte salm en avokado-suurroom
Vir 2.
'n Omelet is een van my gunsteling ontbyte, want
dit bly tog altyd 'n groot bederf! Daar is
ontelbare vulsels wat jy kan maak, maar hiérdie
salm en avokado-suurroom sit dié omelet in die
klas van yslike bederf! Vir die Ystydperk van
bederf, bedien dit met
kruiemuffins.
|
|
1 klein avocado
15 ml suurlemoensap
50 ml suurroom
3 eiers
3 eetl. (45 ml) water of melk
10 ml ligte olyfolie
5 ml botter / margarine
sout, varsgemaalde swartpeper
80 g gerookte salm, in repies of
gerookte gepeperde forel, gevlok
vars dille of gedroogde dille
Sny die avokado in blokkies, meng met
die suurlemoensap en suurroom. Druk van
die avokadoblokkies fyn om dit effens te
verdik. Geur met sout en swartpeper.
Klits die eiers en water saam. Verhit
die olie in 'n braaipan en voeg die
margarien by. Die pan moet baie warm
word. Dis gewoonlik gereed as die
margarien klaar geborrel het en begin
stil word. Gooi die eiermengsel in. Trek
dan die eier van die kante af in en laat
die lopende eiermengsel daarin loop.
Doen dit totdat al die rou eier in is.
Geur met sout en varsgemaalde swart
peper. Braai totdat dit net-net gaar is.
Skep die gevlokte, of repies, vis op die
een helfte. Skep die avokado-suurroom bo-op.
(Jy kan van die avokado-suurroom uithou
om saam met die omelet te bedien.) Vou
die omelet in die helfte. Strooi dille
oor. Deel in 2 en dien dadelik, warm op.
|
 |
|
