Nie net nóg 'n noenontbyt nie! jouleefstyl hoofinhoud terug na jouleefstyl volgende artikel vorige artikel deur Wilna Myburgh   Bederf vriende en familie met hierdie brunch Ek hou nooit daarvan om dinge op die gewone manier te doen nie. Nie dat daar iets fout is met tradisie nie, inteendeel. Soms het mens egter net nodig om iets nuuts te doen. Wat natuurlik die groot vraag laat ontstaan het: "Wat?" En daarmee saam: "Wat is 'n noenontbyt?" Ek weet nog steeds nie werklik of daar een definisie vir "brunch" is nie. Dit kan enige tyd tussen 10 en 2 geniet word en het gewoonlik 'n verskeidenheid kosse wat jy gewoonlik vir ontbyt en middagete sal eet, soos spek, eiers in enige vorm, vis, slaai, brood. Tog is daar gewoonlik ook vrugte, wat jy nie sommer by middagete sal kry nie. Hier is die noenontbyt-menu: Gebakte pomelo met granola-joghurtroomys Aartappelwiggiegebak met verskeidenheid bolae Toffie-wiele Al die hoeveelhede is gemik daarop om 6 persone lekker te laat eet! Dis glad nie toeval wat gemaak het dat pomelo se ander naam bitterlemoen is nie – dis die waarheid! Maar as jy nou so bietjie suikertjies oorstrooi en dit bak is dit heerlik. Die granola-joghurtroomys komplimenteer die bitter smaak perfek. En moenie bekommer om dié roomys vir ontbyt te eet nie – dis eintlik gesond! Jy kan dit natuurlik as nagereg ook bedien – dit werk alkante toe! Ek besef dat roomys nie die beste wintervoorgereg is nie, maar aangesien die sonnetjie al goed skyn teen twaalfuur se kant is dit nie werklik 'n probleem nie. Veral nie saam met die warm pomelo nie. 3 pomelo's, in die helfte gesny 30 ml bruinsuiker granola-joghurtroomys* Verhit die oond tot 180 °C. Nadat jy die pomelo's in die helfte gesny het, vat 'n klein, skerp mes en sny rondom elke wiggie. Jy hoef dit nie heeltemal los te sny nie, sny net die drie kante van elke wiggie. Dit maak die pomelo baie makliker om te eet met 'n teelepel. Besprinkel elke pomelo-helfte met ongeveer een teelepel bruinsuiker. Die hele bokant moet bedek wees, so jy kan maar meer ook gebruik. Bak dan vir 5 – 8 minute in die voorverhitte oond totdat die suiker gesmelt is en dit net deurwarm voel. Skep vir elke persoon 'n halwe pomelo en 'n skeppie of twee roomys in. *Vir die granola-joghurtroomys: 200 g granola of muesli met vrugte en neute in, of gewoon as verkies** 100 g gemengde bestanddele      20 g klapper                                                 35 g pekanneute, gekap                                                 35 g sultanas                                                 10 g rosyne                                                 50 g heuning 500 ml vanieljejoghurt (indien jy gewone joghurt gebruik, kan jy nog heuning byvoeg) 250 ml melk Verhit die oond tot 180 °C. Sprei die granola of muesli, klapper, pekanneute, sultanas en rosyne op 'n bakplaat uit. Rooster vir 5 minute in die voorverhitte oond. Gooi dan die heuning oor en roer deur. Plaas terug in die oond vir nog 3 minute om die heuning te smelt. Roer weer sodat alles gemeng is. Laat eenkant om af te koel. Wanneer die mengsel afgekoel het, kan jy die joghurt en melk meng en dit daarby voeg. Meng goed deur. Gooi nou die mengsel in jou roomysmaker, of plaas dit in die vrieskas en roer elke halfuur om die yskristalle te versprei totdat dit gevries is. ** In totaal is daar 300 g gemengde bestanddele wat jy by die roomys voeg – jy kan dit dus met gemengde muesli of granola maak, of jy kan soos ek klapper, pekanneute, sultanas en rosyne in enige kombinasie van hoeveelhede byvoeg om 100 g op te maak. [terug na bo] "I love toppings. I've always loved toppings. Sometimes I go to restaurants and I just ask for toppings. You know, I say, the more toppings the merrier." Dis een van my gunsteling aanhalings uit die fliek Tortilla Soup, bloot net omdat ek so absoluut daarmee saamstem. Jy kan vir my enige gereg gee en dan sê ek moet self toppings byvoeg – ek is gek daaroor! In hierdie geval het jy 'n gebakte aartappelgereg met groente en 'n verskeidenheid bolae, soos bros spek, biltong, avokado, gegeurde maaskaas, hardgekookte eiers en worsies. Dan gooi elkeen sy eie kombinasie van hierdie bestanddele op die aartappels. Sodoende eet jy al die tradisionele noenontbyt-bestanddele op 'n nuwe manier! Vir die aartappelwiggiegebak 12 medium aartappels sonneblomolie sout en varsgemaalde swart peper 1 rooi ui, in skyfies gesny 1 rooi soetrissie, in repies gesny 200 g sampioene, in skyfies gesny Besluit self of jy die aartappels wil skil of nie – soms verbeel ek my dis baie gesonder as jy dit met die skil gaarmaak. Sny elke aartappel in 8 wiggies en kook dié wiggies vir 10 minute. Skakel intussen die oond aan – 200 °C. Dreineer die aartappelwiggies en gooi in 'n oondpan. Gooi 30 – 50 ml sonneblomolie oor, strooi sout en peper oor die aartappels en bak vir 45 minute. Voeg die rooi ui, soetrissie en sampioene by. Roer om te meng en plaas terug in die oond vir 15 – 30 minute totdat die aartappels gaar en bruin is. Jy kan nog olie ook byvoeg as dit te droog lyk. Jy kan die aartappels in 'n opdienbak skep en nog in die oond hou totdat julle reg is om te eet. Vir die bolae: Maak die bolae terwyl die aartappels bak. Jy hoef nie almal te maak nie, maar onthou "variety is the spice of life"! Die groter verskeidenheid maak dat elke persoon na hartelus kombinasies kan saamvoeg. Jy kan enige ander bestanddele hier toevoeg – gerasperde kaas, geurige maalvleis, geroomde spinasie, fetakaas, gerookte salm – net waaraan jy kan dink! Vegetariërs is ook welkom aangesien elkeen as't ware sy eie kos maak en kan besluit wat hy wil eet. * Spek: Braai spek bros en breek in hapgrootte-stukkies. * Worsies: Maak enige worsies van jou keuse gaar en sny in kleiner stukke. * Biltong: Alhoewel ek eers biltongskyfies gebruik het, was daar 'n eenparige stemming dat fyn biltong baie lekker in die plek van biltongskyfies sal wees. En met die dat hierdie noenontbyt op verkiesingsdag beproef is, sou ek die stem glo! * Avokado: Sny 1 – 2 avokado's in klein blokkies. Voeg suurlemoensap na smaak by, asook sout en baie varsgemaalde swartpeper. Meng dit dan met 'n vurk en proe tot dit reg is. Ek meng dit altyd met 'n vurk want dan druk mens tegelykertyd fyn. * Gegeurde maaskaas: Gebruik 1 bakkie ongegeurde maaskaas. Voeg daarby 30 ml gekapte sprietuie (wit en groen dele), 7.5 ml heelkorrelmosterd, sout en peper. Die maaskaas is heerlik as binding vir al die ander bestanddele. * Eier-"slaai": Kook 4 eiers vir ongeveer 8 minute – hardgekookte eiers, met ander woorde. Haal die doppe af en sny in klein blokkies. Voeg daarby ongeveer 2 eetlepels mayonnaise, 2 fyngekapte agurkies en 1 fyngekapte sprietui. Geur met sout en varsgemaalde swartpeper. [terug na bo] Mens het altyd 'n ou soetigheidjie nodig saam met koffie aan die einde van 'n maaltyd! Hierdie klein, soet wieletjies is vinnig om te maak en net die ding vir 'n klein gaatjie! 50 g botter of margarien 2 eetlepels (30 ml) stroop 1 eetlepel (15 ml) bruinsuiker skilferkorsdeeg kaneelsuiker Plaas die botter of margarien in die mikrogolfoond vir ongeveer 20 sekondes op hoog – dit moenie smelt nie, dit moet net sag word. Voeg die stroop en bruinsuiker by en roer tot dit goed gemeng is. Smeer nou 18 holtes van 2 klein muffinpanne. Verdeel die stroopmengsel tussen die 18 holtes. Sny 12 cm van die skilferkorsdeeg af. Dit maak nie werklik saak wat die lengte is nie. Besprinkel die deeg met kaneelsuiker. Rol op sodat jy 'n lang, dun rol het. Gebruik nou 'n skerp mes en sny 1 cm-wiele af. Plaas nou 'n wiel in elkeen van die stroopgevulde muffinholtes. Nou kan jy dit in die yskas hou tot dit nader aan die tyd van opdiening is, of dadelik bak. Bak vir 10 – 12 minute by 180 °C. Pasop wanneer jy dit uit die pan verwyder aangesien die stroop ongelooflik warm word. Dis ook gevaarlik om dadelik een te probeer – dit moet eers ophou borrel en effens afkoel! Dit kan warm of koud bedien word. [terug na bo]
e-pos hierdie artikel druk hierdie bladsy uit het jy al vir ons nuusbrief ingeteken?	terug na jouleefstyl volgende artikel vorige artikel   Boekmerk dié bladsy, of deel met 'n vriend
Hosted By Afrihost.com - The Best Web Hosting Ever! [ jouapplous ] [ joufiksie ] [ jouhoofstories ] [ jougeskenke ] [ joukontrei ] [ jouleefstyl ] [ joumenswees ] [ joupolitiek ] [ jourubrieke ] [ jouse ] [ joutuisblad ]

Opsoek na enige
onderwerp in jouwêreld?
Deursoek ons hier!