jouleefstyl

  
   Eet, leef en geniet jou tuin!

Maak hierdie lente vriende met jou kwekery
en moenie vir plante skrik nie.

deur Wilna Myburgh
 

Eet jou tuin

Daar is geen groter vreugde as om die spreekwoordelike vrugte te pluk nie. Kruie, groente en vrugtebome kan met groot sukses in die tuin geplant word. Jy hoef nie baie spasie te hê nie - veral as jy net vir jou gesin plant.

Ek plant nie sommer enigiets van saad af nie – dis waarvoor kwekerye daar is, dan nie? Hulle versorg die saadjies tot hul mooi plantjies is wat jy kan oorplant – ek het baie meer sukses, en minder stres, daarmee.

Kruie werk wonderlik in potte, waar jy dit naby die kombuis kan hou. Maak net seker dat daar goeie grond is, genoeg son en baie water. Kruie moet daagliks water kry – op baie warm dae kan jy hulle tot twee keer 'n dag water gee. Verskillende kruisoorte kan ook saam in een groot pot geplant word – 'n goeie kombinasie en van die kruie wat mens die meeste in die kombuis gebruik is Italiaanse pietersielie, origanum, grasuie, basielkruid en tiemie. Koop klein plantjies – net een van elke soort en plant dit dan saam in 'n groot pot. Roosmaryn en 'n lourierboom sal ook 'n definitiewe aanwins vir jou tuin en jou kombuis wees.

Wat 'n vreugde is dit nie om groente vars uit die tuin te haal nie? As jy dit nog nie beleef het nie, ry sommer nou dadelik na jou naaste kwekery! Kersietamaties, groen soetrissies, uie en eiervrug is van my gunstelinge. Die geur van vars groente is onverbeterlik – ek het nooit voorheen eens besef dat eiervrug na iets moet ruik nie.
'n Nuwe neiging is om vrugtebome in groot balies of potte te plant. Die oes sal meer beheerbaar wees en dit vat nie soveel spasie nie. Dis belangrik dat groente en vrugtebome ook genoeg water kry en grond met ekstra voedingswaarde.

Om plante in 'n pot te plant:
Kry 'n stewige pot, met gaatjies onderin vir dreinering. Gooi klein klippies of potskerwe onder in die pot. Dit alles sal help dat die wortels nie te lank in die water staan nie – en nie sal vrot word nie – maar ook dat die water nie te vinnig dreineer nie.
Die pot moenie te klein wees nie – plante werk soos visse – hulle word so groot soos die bak of pot hulle toelaat.

 

Lééf jou tuin

Nee, jý hoef nie buitekant te gaan bly nie – kry lewe in jou tuin deur 'n waterval te installeer of dalk 'n dam met visse en waterplante, en lok voëls en skoenlappers na jou tuin.
Om skoenlappers na jou tuin te lok, kan jy van die volgende kruie plant:  basielkruid, dille, vinkel, laventel, suurlemoenverbena, roosmaryn en viooltjies.
Om voëls na jou tuin te lok: Hou kos en water vir die voëls in jou tuin. Saad kan in pakkies by meeste supermarkte gekoop word. Voël-waterbakke kan ook deel van jou tuindekor wees.

Bring nog meer lewe na jou tuin deur met kleur te speel. Kies 'n kleurtema en bou daarop voort. Of laat die tuinmuse jou lei en gaan bont! Alles gaan oor of jou tuin vir jou plesier verskaf. As "speel met kleur" vir jou na 'n oorweldigende konsep klink, kry vir jou 'n kleurwiel en leer meer oor kleurskemas. Dit kan help om fokuspunte met maksimale trefkrag in jou tuin te skep.

 

Die green, green grass of home

Om die groener gras aan die ander kant van die heining te kry, moet jy dit 2 – 3 keer per week baie water gee. Blykbaar is grasplantjies baie lui en sal slegs groei as die wortels in die water staan. As die wortels aangespoor word om tot by die watervlak te groei, word dit sterker en is die hele plant gelukkiger. Dit is ook belangrik om nie te veel gras te sny nie. Moenie my as 'n verskoning gebruik om nooit die gras te sny nie – daar moet net ongeveer een derde van die gras op 'n keer afgesny word, anders gebruik die plant al sy energie om weer te groei, eerder as om sterker wortels te maak. Moet ook nie met 'n stomp lem sny nie, dan beskadig jy die plant.  

As jy sien dat die gras op 'n sekere area nie wil groei nie, moenie dit forseer nie. Gras wil dikwels nie onder groot bome of skadukolle groei nie, en al wat jy gaan hê is 'n modderige skaatsbaan. Plavei daardie areas. Nie net sal jou tuin minder verwaarloos lyk nie, dit sal ook minder water gebruik.

 

Geniet jou tuin

Elke tuin moet 'n gemaklike sitplekkie hê, sodat jy die natuur en jou handewerk kan bewonder. Kies die perfekte plek uit waar jy luilekker in die skadu kan sit en lees. So van lees gepraat, in verlede maand se uitgawe, kan jy lees hoe om jou eie mosaïektuintafel te maak en wenke om tuinuitleg te doen.

Alles wat jy in jou tuin insit, sal jy weer kan terugkry – kos, suurstof én vreugde!