|
jouwêreld
het verlede maand 'n spesiale kuiergas uit 'n verre land in die
Middeooste gehad. Voor julle nou té spesiaal
voel – sy het nie vir my of vir julle kom kuier
nie, maar vir medewerker Saartjie de Wet en dié
het haar goedgunstelik "geleen" om vir ons aan't
huis te kom kerrie maak.
Shelagh Innes is in Sri Lanka gebore en is op
kerrie grootgemaak. In haar wêreldreise het sy
telkens by restaurante se kombuise ingeloer en
gevra dat hulle haar leer hoe om hul kerrie te
maak. Sodoende het sy 'n groot versameling
resepte bymekaar gemaak. Sy het vir ons die
maalvleiskerrie met die unieke koolbygereg
gemaak.
En nou kan julle dit ook maak! En, hopelik net
so geniet soos ons die ete geniet het!
Maar eers, 'n belangrike kennisgewing: Kerrie is
'n spesery. Nie net iets wat die tong brand en
in 'n pakkie in die supermark verskyn nie.
Dit bestaan uit verskillende speserye wat
volgens smaak gemeng word. Sien, dis die Britte
wat alles omgekrap het. Nadat hulle kerrie in
Indië geproe het, het hulle besluit om dit vir
hulself makliker op eie bodem te maak en het
begin om kerriepoeier te vervaardig. Kommersiële
kerriepoeier is nie soos die "regte" kerrie nie.
Jy sal dit gou agterkom as jy dit self begin
maak. As jy meer oor
speserye wil leer kan jy gerus in die
September-uitgawe van die verskillende speserye
lees. Daar is ook 'n resep vir
Madras-kerriepoeier wat jy self kan maak.
'n Kerriemaaltyd bestaan gewoonlik uit drie of
vier verskillende bygeregte van kerrie. Hierdie
kerries kan enigiets van vleis, aartappels,
lensies en groente tot vis of eiers bevat. Dit
word met basmatirys bedien en blatjang en
sambals. Natuurlik moet jy nie die poppadoms
vergeet nie!
Ongeag van watter soort kerrie jy maak, begin jy
altyd deur die speserye te braai. Jy besluit
watter geure jy wil hê en die uitverkorenes word
in olie of botter gebraai. Sodoende stel jy die
geure vry en kan die speserye goed al die
bestanddele wat jy nog gaan byvoeg bedek.
Hierdie is die kerrie-ekwivalent van
tradisionele vleis, rys en aartappels – die rys
is in die geval basmatirys, die vleis is die
maalvleiskerrie, en aartappelkerrie vervang die
gebakte aartappels. Dan het jy nog die
"slaai/groente"-komponent, in die geval die
kool- en klapper. En dit werk baie goed so! |
