|
Klein kindertjies in die motor en die langpad is
dikwels nie versoenbaar nie: die kinders raak
verveeld en pa raak geïrriteerd met hul gekerm.
Die langpad hoef egter nie vir die hele gesin 'n
uitmergelende marteling te wees nie – dit is die
ideale geleentheid om van dié beskikbare tyd
gebruik te maak om deur middel van
groepspeletjies kwaliteittyd saam te spandeer.
En in die proses van die langpad 'n kortpad te
maak – vol pret en aktiwiteite!
Probeer van die volgende speletjies in die
motor:
Vir baba:
As baba moeg raak vir sy gewone speelgoed, gee
vir hom 'n alternatief wat hom vir lank besig
sal hou: vul 'n kussingsloop met gefrommelde
koerantpapier om mee te speel. Behalwe dat dié
nuwe speelding hom sal fassineer, is dit ook
goed om sy tassintuig te stimuleer en vir
gehoorontwikkeling.
Vir kleuters:
●
Teken verskillende gesiggies op die kleuter se
vingers, elkeen met 'n ander gesigsuitdrukking:
soos kwaad, gelukkig, huil, ens. Nou kan jou
kind met behulp van die verskillende karakters
op sy vingers, sy eie stories opmaak en dit
uitspeel.
●
Pak 'n dik tou in en maak knope daarin. Die
kleuter moet probeer om die knope los te maak.
●
Pak wasgoedpennetjies in. Die kind moet kyk
hoeveel pennetjies hy kan vasmaak aan 'n
handdoek, die tou, kledingstuk, of enigiets
anders wat jy in die motor het.
●
As jy meer as een kind het, kan hulle die
wasgoedpennetjies vir mekaar met hulle tone
aangee.
Skoolgaande kinders:
●
Merk jul reisvordering: Pak 'n klein
kaart of padatlas in en gebruik plakkers om jul
roete aan te dui.
●
Teken: Jy kan iets teken wat jy langs die
pad sien en die ander moet raai wat jy geteken
het – amper soos Pictionary.
●
Vertel stories: Die gesin ontwikkel hul
eie storie. Pa begin bv. met "Eendag was daar 'n
man wat alleen in 'n houthuisie in 'n groot bos
gebly het . . .". Daarna kry elke gesinslid 'n
beurt om 'n sin by die storie te voeg, totdat
die verhaal 'n hoogtepunt bereik het.
●
Liedjie-raai: Elkeen kry 'n beurt om 'n
bekende liedjie te neurie of te fluit, waarna
die ander die naam van die liedjie moet raai.
●
20-vrae: Die eerste persoon dink aan iets,
waarna die res 20 vrae kan vra om uit te vind
waaraan hy dink. Die een wat eerste reg raai,
wen die rondte. Die wenner begin dan met die
volgende rondte deur weer aan iets te dink.
●
Noem 'n naam: Die eerste persoon noem die
naam van 'n dorp, stad of plek – bv. "Kaapstad".
Dan moet die volgende persoon die naam van 'n
dorp, stad of plek noem wat met dieselfde letter
begin as dit waarmee die vorige een geëindig het.
In dié geval kan dit "Durban", "Dundee" of "De
Aar" wees. Name wat die volgende speler dan kan
noem, kan insluit "Nooitgedacht", "Elandspoort"
of "Rosmead".
●
Die alfabet: Elke gesinslid kry 'n beurt
om, op die alfabet af, vir elke letter 'n naam
of woord te kies. Speel in verskillende
kategorieë soos Bybelname, plekke, noemname, ens.
●
Speel jou gunsteling: Elke gesinslid moet
sy top vyf gunstelinge saamstel – deel die
speletjie in verskillende afdelings op soos
liedjies, boeke, lekkergoedsoorte, TV- of
rekenaarspeletjies, helde, ens.
●
Koop 'n CD met ou gunsteling-kinderliedjies.
Die hele gesin kan dan saamsing en ook 'n
gesamentlike bewegingsroetine op maat van die
musiek uitwerk. Die motorbestuurder mag
natuurlik nie aan dié aksie deelneem nie! jouwêreld
beveel die splinternuwe CD kompilasie-album van
Cora Maríe, Sing vir die kinders, wat so
pas op die mark verskyn het, aan.
●
Sodra iemand baklei: Stop en laat die
skuldige twee keer om die motor hardloop.
|
