|
Wat is nou lekkerder as om jou eie koekies te
bak? Hierdie koekies is perfek om aan die
kersboom te hang of as geskenke te gee. By
supermarkte kry jy verskillende vorms om koekies
mee uit te druk.
Daar is egter 'n paar reëls wat jy moet weet
voordat jy begin bak:
*
Was altyd jou hande voordat jy begin koekbak.
*
Trek 'n voorskoot aan – dit help om jou klere
skoon te hou.
*
Kyk na die resep en kyk of jy alles het wat jy
nodig het om die koekies te bak.
*
As jy warm panne moet hanteer – onthou jou
oondhandskoene of vatlappies. Wees versigtig –
vra eerder jou ma of ousus om te help.
*
Vra altyd eers vir jou ma of jy koekies mag bak
en onthou om na die tyd op te ruim.
*
As jy mors vee dit dadelik op.
*
Lees die resep versigtig deur en kyk of jy
verstaan wat jy moet doen. Vra ma om saam met
jou te lees en te verduidelik waar nodig.
Reëls vir ma's
*
Wees by jou kind al sit jy nou 'n tydskrif en
lees – wees daar!
*
Moenie met jou kinders raas as hulle dalk mors
nie – dit is hoe mens leer
*
Kinders wat van kleinsaf handig is in die
kombuis help makliker as hulle groot is.
*
Geniet dit saam met jou kind!
Resep vir soetkoekies
2/3 koppies (160 ml) margarien
¾ koppie (180 ml) suiker
2.5 ml vanielje
1 eier
15 ml melk
2 koppies meel
10 ml bakpoeier
1 ml sout
Room margarien, suiker en vanielje. Voeg die
eier en melk by.
Sif meel, bakpoeier en sout.
Voeg dit by die margarienmengsel. Meng dit
deeglik.
Deel die deeg in 2 dele. Plaas op waspapier, vou
toe en plaas in yskas vir 1 uur of in die
vrieskas vir 20 minute as jy haastig is.
Skakel die oond op 180 °C.
Neem die deeg uit die yskas. Haal dit uit die
papier en rol op 'n meelbestrooide oppervlak uit.
Dit werk makliker as jy elke keer net 'n klein
stukkie deeg neem.
Druk vormpies uit. Plaas op 'n bakplaat en druk
'n gaatjie aan die bokant in met 'n strooitjie
as jy dit aan die kersboom wil hang. Smeer met
eierglasuring as jy wil - kyk na die
verskillende maniere waarop jy die koekies kan
versier.
Bak vir 6 minute. Haal versigtig uit die oond en
plaas op 'n rakkie om af te koel.
Daar is verskillende maniere om jou koekies te
versier:
1.
Eierglasuring
Meng 1 eiergeel met 5 ml water. Roer met 'n vurk
om te meng.
Verdeel die mengsel tussen verskillende klein
bakkies.
Nou kan jy by elke bakkie 'n ander kleur
voedselkleursel gooi.
Verf met 'n sagte kwassie die koekies voordat jy
hulle in die oond sit.
Wanneer die koekies uit die oond kom en afgekoel
het, kan jy hulle ook met van die kleurvolle
versiersuiker versier.
2.
Vensterkoekies
Om kleurvolle venstertjies in jou koekies te
maak, doen die volgende:
Druk koekies met 'n groot drukker uit, soos 'n
groot sirkel of 'n groot ster. Druk dan met 'n
kleiner sterdrukker, of ander drukker, 'n gat in
die middel van die koekies.
Sit harde suiglekkers in 'n plastieksakkie en
slaan hulle met 'n koekroller stukkend. Maak nou
die gaatjie in die koekie met die stukkies vol.
Jy kan al die kleure meng of die kleure apart
hou.
Bak dieselfde as die gewone koekies. Onthou om
'n gaatjie in te druk sodat jy garing kan
deurryg om die koekies aan die boom op te hang.
3.
Versier koekies nadat dit gebak is
Meng 50 ml versiersuiker met 5 ml melk. As dit
nie loperig genoeg is nie, kan jy nog melk
bygooi. Pasop net dat jy nie te veel bygooi nie.
Kleur nou jou versiersuiker in enige kleur wat
jy wil. As jy die versiersuiker tussen klein
bakkies verdeel, kan jy sommer baie verskillende
kleure maak.
Wanneer jou koekies koud is kan jy hulle met die
versiersuiker na hartelus versier.
*
Het jy vergeet om gaatjies in te druk voor jy
die koekies gebak het?
Moenie bekommerd wees nie – druk net versigtig
met 'n tandestokkie 'n gaatjie in elke koekie.
|
