|
Seekos-ervaring geskik vir 'n koning |
Die Strandkombuis aan die Weskus is beslis 'n
besoek werd vir seekos- en natuurliefhebbers. En
dit is presies wat die naam sê: 'n kombuis op
die strand. Hiér word daar gebak én oor die kole
gebraai.
Die Strandkombuis kan slegs per grondpad, of per
voet oor die 16-myl spierwit sandstrand, bereik
word. Grondpad sal jou ongeveer vyf kilometer
uit Yzerfontein neem en strand-langs vereis 'n
fikse 20 minute staptog.
Die Strandkombuis, met sy ruwe houttafels en –bankies,
en 'n boot wat digby die tafels in die seesand
lê, smelt perfék saam met die omgewing. Die
enigste "onnatuurlike" toevoeging is die
markiestent, maar dit dien wél sy doel – dit
keer die Kaapse Suidooster weg en sorg dat die
wind nie jou kos vol seesand waai nie.
Natie en Marie se etes beloof om 'n
gastronomiese ervaring te wees – soos die vissop
voorgesit met tuisgebakte wit- en bruinbrood,
konfyte en vispatee. Tydens die hoofgereg kreun
die tafels onder bakke met calamari, mossels,
koningklip, snoek en garnale. Maar die einde is
nog nie in sig nie: Skep gerus ook 'n
pampoenkoekie, aartappelwiggies en slaai in!
Neem 'n blaaskans voor nagereg en stap met die
paar houttrappies af strand toe terwyl die sand
salig deur jou tone kriewel. As jy genoeg moed
het, kan jy lyf natmaak in die koue Atlantiese
Oseaan. Wees egter versigtig: Dis nie 'n
swemstrand nie.
Dié romantiese ligging is ideaal vir
huweliksonthale, en menige bruidspaartjies het
inderdaad al hier op die strand die knoop
deurgehaak. Korporatiewe funksies is ook
besonder gewild. Die "kombuis op die strand" is
'n gunsteling onder Europeërs. Sommige kom trou
of vier sommer 'n verjaarsdag hier en bly 'n
paar dae oor. Wat Suid-Afrikaners aanbetref –
hier tref jy die onopgesmukte, stylvolle
alternatiewe denker en leefstylghoeroes aan –
dié wat wil wegkom van formele
mensgemaakte-dinge.
Dus, as jy jou ete met koffie en vet
boere-koeksisters afgesluit het, is jy welkom om
nog te ontspan en die vars seebriesie te geniet.
Hiér het die tyd stil gaan staan.
|
Yzerfontein se sestienmyl-strand |
