|
Terwyl ek nou die dag deur die dorp ry, begin my
kinders ewe skielik histeries te gil: "Kyk, die
boom!"
Een van die dennebome langs die biblioteek pryk
met reuse rooi en silwer balle en liggies. Dit
is ons eerste Kersfees in Albany (Australië) en
ons is nog nie bekend met die rituele hiér nie.
Die hoofstraat se tooisels het kort daarna
gevolg; én 6 Desember is Kersfees-parade!
In Perth word sommige strate getooi in die
allermooiste liggie-versierings, en daar is
kompetisies vir die bes versierde huise. Ons het
die vorige twee Desembermaande baie aande ver
ente gaan stap om na al die mooi huise te kyk.
Ons het natuurlik self ook aan die prettigheid
deelgeneem, en ons voortuin opgevrolik met 'n
verskeidenheid liggies.
Hierdie versierde huise word dan ook op baie
plekke vir 'n goeie doel aangewend waar mens
deur die sprokieslandskap kan gaan stap en 'n
donasie kan gee vir 'n liefdadigheidsorganisasie.
Ons het die Liggie-huis in Beckenham besoek –
dié mense was reeds vanaf September besig om al
die versierings op te sit. Die garage is omskep
in 'n reuse vertoonarea waar al wat 'n
Kersfees-figuurtjie uitgestal is.
Selfs die natuur sorg vir sy eie versierings.
Met die winterreënval is die natuur maar dor en
droog teen hoog somer – dit is dan wat die
voëlent op die bome helderoranje blom en die
landskap opvrolik!
Ek ervaar ongelooflike welwillendheid en 'n gees
van omgee onder die mense hier, wat natuurlik 'n
hoogtepunt gedurende Kerstyd bereik. Die kinders
by die skole samel items in om aan
welsynsorganisasies te gee. Daar is groepe wat
die hele jaar lank geskenkbokse opmaak om aan
Derdewêreldlande se mense te gee. Kerke het
natuurlik hul eie welwillendheidsaksies wat
regoor die wêreld strek.
Na die kersdiens is daar altyd gemeentelede wat
hul deure oopgooi vir mense wat die dag
andersins alleen sou deurbring: Enigiemand is
welkom om 'n maaltyd in goeie geselskap te gaan
geniet. "No worries, mate!"
Dié week deel vrywilligers 'n spesiale
donasie-sak saam met ons weeklikse
streekskoerant in Albany uit. Die gemeenskap is
gevra om asseblief nie-bederfbare voedselitems
daarin te plaas en dit dan weer by die posbusse
neer te sit, waar die vrywilligers dit dan oor
die naweek sal kom insamel. Hiérdie bydraes vul
dan weer die gemeenskap se nood-voedselvoorraad
aan wat uitgedeel word aan mense wat in nood
verkeer.
Gedurende Desember organiseer meeste stadsrade
'n Carols by Candlelight,
wat dan ook baie goed ondersteun word deur die
gemeenskap.
Die hartseer teensy van die Kerstyd hiér is dat
die ware kersboodskap verlore bly vir soveel
mense. Die Kersverhaal word vertel soos 'n
storie, met geen geestelike betekenis nie.
In Oz word daar ook na die Kersseisoen verwys as
die "silly season". Streng gesproke begin dit in
Julie elke jaar wanneer die drie groot
kettingwinkelgroepe hul jaarlikse
speelgoed-uitverkopings hou en mens dan jou
inkopies kan bêrekoop tot Kersfees.
Hierdie jaar het ek by die malligheid ingeval.
Ek het my (baie beskeie) kersinkopies saam met
die res van Albany se mammas in 'n dolle trollie
jaagtog gaan koop en ge-lay-by tot
Kersfees. Daar waar ons staan en wag in die
kronkelende betaal-toue deur die winkel, kon ek
my net verstom aan die baie oorlaaide trollies
wat kreun onder duur goedkoop-vermaak vir die
kinders. Daar was darem net soveel trollies wat
meer praktiese geskenke in gehad het ook. Die
gewag het natuurlik in 'n groot kuier ontaard,
soos net 'n klomp vroumense saam kan! 'n Gawe
winkelassistent het deur die toue beweeg en
suigstokkies uitgedeel om al die kindertjies
geduldig te hou.
Maar hierdie is net die begin van die
kersinkopies: wanneer die winkelsentrums se
jaarlikse versierings opgesit word, hervat dié
sport met nuwe ywer. Behalwe vir daai "nog
ietsie kleins" vir onder die boom, moet daar ook
omgesien word na die spyse vir die groot dag!
Kersdag is 'n dag wanneer vriende en familie
bymekaar kom en lekker kuier. Die spyskaart wat
daarmee gepaard gaan, wissel van 'n tradisionele
swaar ete met geglasuurde ham en kalkoen, tot
ligte koel slaaie saam met 'n barbie
(Aussie-styl braai). Baie gesinne pak 'n
piekniekmandjie vir 'n dag op die strand of in
die park.
Alle besighede is gesluit op Kersdag, dus moet
mens voor die tyd seker maak dat jy alles het
wat jy nodig gaan hê. Daar is net hier en daar
'n vulstasie oop om mens met die allernodigste
uit te help – natuurlik teen 'n prys!
Almal sien uit na 'n paar dae se blaaskans om
die batterye te herlaai en die Nuwejaar dan met
nuwe krag aan te pak. So is ons huishouding ook
stadig maar seker besig om daardie
einde-van-die-jaar gevoel te kry. Die pakkies,
vir die familie wat ver is, lê reg om gepos te
word – en óns spyskaart is in die
beplanningsfase!
Ek wens jul almal 'n wonderlike geseënde feestyd
toe – regoor die wêreld! Mag daar vrede en
vreugde vir almal heers. |
