|
Al die oorspronklike resepte wat in jouwêreld
geplaas word, word eers vooraf oor en oor
getoets. Dan word die veranderings aangebring:
bietjie meer van dit, bietjie minder van dat,
nog 'n ekstra bestanddeel of twee om die smaak
nét reg te kry. Die jouwêreld-leser
moet tog bederf word met van die lekkerste en
uniekste resepte denkbaar – net die beste is
goed genoeg vir ons lesers!
Daarna volg die laaste en deurslaggewende toets:
wat sal die mense daarvan sê?
Eenvoudig: vra hulle self! Elke maand se resepte
word dan finaal voorberei en tydens informele
funksies aan 'n klein groepie gaste voorgesit.
En eers dán, eers wanneer die koppe van
genoegdoening knik, eers dán vind dié resep sy
weg na die volgende uitgawe van jouwêreld!
In Desember bied ons 'n
volledige spyskaart
waarmee die gasvrou vriende en familie op die
internasionale manier kan bederf. Daar is
resepte vir die maak van vier eksotiese
skemerkelkies, asook vir talle bypassende
watertand-eethappies, alles afkomstig van
verskillende wêrelddele.
Dié spyskaart is in November aan 20 gaste
voorgesit vir die finale toets – en ons kon geen
beter plek as die Mosaic-gastehuis (B&B) in
Ventersdorp kry nie!
Terwyl die gaste, stylvol in aanddrag uitgevat,
in die gasvryheid wat die plaas-atmosfeer van
die gastehuis bied weggesak het, het hulle
hulself watertand oorgegee aan die versnaperings
op die tafel. Die vier verskillende
skemerkelkies wat die kos gekomplimenteer het,
is met die een na die ander lofprysing begroet –
en daar is tot ná middernag gekuier!
Die foto's op dié blad vertel die hele storie
verder . . . |
