|
Motoriste wat hul gereeld op die N14-hoofroete
tussen Gauteng en die Noord-Kaap bevind, is
bewus van dié klein dorpie – so ongeveer twee
ure se ry vanaf Johannesburg – waarby die
hoofpad hul neem.
Ventersdorp, vertel die afdraaibord.
Wanneer jy dan jou oë vir 'n paar sekondes vanaf
die warm teer wat voor jou uitstrek wegneem,
sien jy Ventersdorp aan jou regterkant – so 4km
of wat vanaf die hoofpad.
En dit is dan net hier waar menige motoris al
die grootste fout van sy lewe gemaak het – om
dan nié af te draai opsoek na 'n oornagplekkie
vir die moeë gees nie.
Omdat hy dink dié dorp is te klein om aan sy
eet- en slaapbehoeftes te voldoen.
Fout! Fout! Fout!
Want een van die vriendelikste, gasvryste en
mees nostalgiese B&B's op die N14-roete word
hiér gevind: die Mosaic-gastehuis, waar die tam
reisiger nie net rus vir sy liggaam gaan vind
nie, maar ook vrede en rustigheid vir die siel.
Die gevaar bestaan natuurlik dat jy langer gaan
vertoef as wat jy beplan het . . . want dié plek
drup van plaas-nostalgie en tradisionele
plattelandse vriendelikheid!
Die hoofgebou is vanuit 'n ou skuur omskep tot
'n eetsaal, funksievenue, kuier-area, kroeg en
'n kombuis. Die dekor neem die gas 'n hele paar
dekades terug: vanaf die ou weefmasjien by die
ingang tot die plaasgereedskap wat teen die mure
hang.
Op tipiese warm Noordwes-aande kan drankies
buite onder die veranda geniet word, met 'n
uitsig oor die swembad en die ongerepte
veldvlaktes wat daaragter wink. Vir die fikse
toeris, wat nou nie te haastig is om die
volgende oggend vroeg die pad te wil gryp nie,
is die staproetes deur die veld die ideale
manier om die varsheid van 'n Noordwes-oggend
mee in te asem.
Wees egter gewaarsku: as jy te laat die oggend
wegspring, kan dit nogal warm daar in die veld
raak. Sus jou dan met die wete in die agterkop
dat daar 'n koue bier en swembad by die
gastehuis wag – en natuurlik 'n stewige ontbyt!
Langs die "skuur" is sewe oornagkamers gebou en
ingerig volgens die behoefte van die moderne
reisiger: die en-suite badkamer, TV-stel en 'n
ketel met voorraad vir jou
oggend-koffie-en-beskuit is standaard. In die
groter kamers gaan jy 'n kroegyskassie vind. Net
vir die wis en die onwis.
Met die kreatiewe binnehuisversiering van die
kamers is die romantiese plaasagtergrond-konsep
voortgesit met die unieke gebruik van sinkplate,
oud-styl krane en spieëls en muurpatrone. In die
binnehof, wat op die oorblyfsels van 'n
tennisbaan gebou is, is talle klein tuintjies
aangelê wat met ou plaasgereedskap en
–toerusting afgerond word. 'n Klip-spuitfontein
vorm die fokuspunt.
Jy kan natuurlik jou tyd so beplan dat die
Mosaic B&B nie net 'n vinnige oornag-stoppie is
nie, maar ook jou verblyfplek vir 'n dag of drie
terwyl jy die Ventersdorp-omgewing ontdek.
Sowat 6 km buite die dorp, op die Kosterpad,
vind mens die Schoonspruitrivier waarvan die
dorp vir sy water afhanklik is. Selfs in droë
tye vloei dié rivier steeds. Die eerste
gebottelde water in Suid-Afrika, Schoonspruit,
is vanuit dié rivier afkomstig.
Verskeie damme in die omgewing, soos die
Rietspruitdam-oord, Elandskuildam en die
Klerkskraaldam, bied vir die hengelaar en
watersport-fanatikus 'n idilliese natuurparadys.
Ander besienswaardighede sluit in die
Tarentaal-staproete en die Swartrandgrotte. Vir
'n volledige lys van wat jy alles in dié
omgewing kan sien en doen, praat met die eienaar
van die Mosaic B&B, of kontak die Ventersdorp
Toerismekantoor (018
464 9021).
Ventersdorp is in die Vaalriviervallei, op die
grens tussen Gauteng en Noordwes, geleë, en is
ongeveer 180 km vanaf die Johannesburg
Internasionale lughawe, 50 km vanaf
Potchefstroom, 160 km vanaf Pretoria, 100 km
vanaf Krugersdorp en 85 km vanaf Lichtenburg
geleë.
Die N14-hoofroete tussen Gauteng en die
Noord-Kaap, asook die R30 en R53, loop deur dié
dorp.
Maar die Mosaic B&B se gasvryheid is nie net op
die toeris gemik nie.
Die fasiliteite is ook baie gesog onder inwoners
van die omgewing vir huweliksonthale,
herdenkings, korporatiewe funksies, konferensies
en verjaarsdagpartytjies.
|
