jouhoofstories

 
Kerklike offergawes – word gelowiges mislei?

Die Benny Hinn-Ministries het tydens hul Suid-Afrikaanse saamtrek in Randburg God se seën belowe  - in ruil vir R7 500
 

deur Jaco Hough-Coetzee
 

God se seën kos sowat R7 500. Betaal dié geld, en God se seën sal binne ure – in die vorm van groot rykdom en persoonlike skuld wat afgeskryf sal word – op jou neerdaal.

Dit is wat die pastoor vir die kerkgangers gesê het. Hulle het gehoor gegee, en in hul hordes na vore gestorm om hul offerandes te bring.

Julie 2008. Die Coca-Cola Dome in Randburg is met sowat 18 000 mense gepak wat opsoek is na geestelike voeding – hulle is opgewonde, want dit is nou ook nie aldag dat hulle die geleentheid kry om die groot Amerikaanse evangelis en geloofsgeneser, pastoor Benny Hinn, in lewende lywe te sien nie. Hulle het gekom om na sy boodskap van heling en genesing te luister, en om wonderwerke te sien gebeur.
Maar die internasionale Benny Hinn-Ministries is ook bekend vir sy sogenaamde "prosperity teachings", waar mense van reg oor die wêreld aangemoedig word om reuse bedrae aan die organisasie te skenk in ruil vir God se seën.

En Randburg, Suid-Afrika, was ook geen uitsondering nie.
Gedurende die bediening-byeenkoms in die Coca-Cola Dome het een van Hinn se mede-pastore op die verhoog, Todd Koontz, oor finansiële laste gepreek.
Sy tema was die een van "goeie saad": om 'n goeie oes te hê, moet jy eers prakties saai, het hy gesê.

Toe belowe hy dat dié byeenkoms binne ure miljoenêrs deur God se seën sal oplewer, en dat ander se finansiële laste en persoonlike skuld binne 'n dag deur Goddelike wonderwerke opgelos sal word. Maar om hiérvoor in aanmerking te kom, moes die gehoor onmiddellik 'n offergawe van $1 000 (sowat R7 500) aan die bediening maak. Die gehoor het vorentoe gestorm – want Koontz het hulle gewaarsku dat die uitstorting van dié seën net twee minute lank sou duur.
Langs die verhoog het personeel van die Benny Hinn-Ministries gereed gesit met onder andere kredietkaartmasjiene om die geld in ontvangs te neem.
Volgens 'n pastoor van Roodepoort wat ook die saamtrek bygewoon het, het ten minste 1 000 mense in toue gestaan om hul offergawes te bring en sodoende is miljoene rande vir die Benny Hinn-Ministries ingesamel.
Hiérna is nog 'n algemene kollekte-insameling ook gedoen.

Maar past. Tommie Ferreira van Roodepoort, wat ook as vrywilliger in die koor tydens die saamtrek gesing het, voel ongemaklik hieroor. Hy het na die tyd gesê dat hy nie die Hinn-bediening wil beswadder of benadeel nie, maar dat hy 'n probleem daarmee het as predikers ongegronde bewerings maak net om mense se geld in die hande te kry.

Vroeër vanjaar, tydens 'n Goeie Vrydag-saamtrek in Londen, het die Benny Hinn-Ministries ook die gehoor versoek vir 'n $1 000 offergawe per persoon. In Februarie het hulle tydens 'n byeenkoms in Australië, wat deur sowat 50 000 mense bygewoon is, ongeveer R5.8 miljoen ingesamel. 

Die Amerikaanse-regering het teen die einde van verlede jaar 'n intensiewe ondersoek na die finansiële bedrywighede van ses van Amerika se grootste evangeliste begin – en Hinn was een van hulle. Die finansiële komitee van die senaat het onder andere briewe aan dié ses gestuur waarin hulle gevra het vir meer inligting oor hul inkomste en geldsake. Dié ondersoek het gevolg nadat die Amerikaanse regering 'n rits klagtes van die publiek oor moontlike finansiële wanpraktyke ontvang het.
Hinn beskik ook oor sy eie privaat straler-vliegtuig wat hy gebruik om by al sy wêreldwye saamtrekke uit te kom.

Volgens Benny Hinn-Ministries se webwerf, het dié organisasie in 2006 meer as R350 miljoen se offergawes ingesamel. Dié geld word weer aangewend om behoeftiges wêreldwyd te ondersteun. Hulle het onder andere 'n voedingskema vir kinders in Durban, en het verlede maand 'n ondersteuningsveldtog vir Suid-Afrikaanse vigslyers aangekondig.

Hinn verduidelik dat sy bediening se "prosperity teaching" eintlik deur baie misverstaan word.
Hy sê dat die beginsel van voorspoed reg deur die Bybel voorkom.
"Om vir God te gee is só belangrik, dat Hy belowe het dat dié wat in Sy Woord belê, geseën en beskerm sal word."

 

jousê
Wat is jou standpunt oor dié manier van offergawes insamel?
Dra jy elke maand jou "tiende" aan die kerkbediening by?
Alle kerke en predikers – in 'n mindere of meerdere mate – lê klem op offergawes vir die bediening. Is dit nodig?
Daar is so baie standpunte, regverdigings en veroordelings hieroor – maar hoe voel jy?

Neem aan die debat deel . . .