|
"Kyk, daar kom Pappa aan," sê Sunél vir haar
boetie, Kobus.
"Wat het hy in sy hande?" vra Kobus.
"Ek dink dit is 'n sak met mielies," meen Sunél.
Pappa kom nader gestap. Dit lyk asof hy swaar
dra en die kinders is baie nuuskierig om te sien
wat dié vreemde pakkie is.
Hulle hardloop vinnig na hom toe.
"As julle twee kan raai wat ek hier het, kan
julle dit present kry," sê Pappa en hou sy hande
agter sy rug.
Die twee maak beurte om te raai: "Dis mielies,"
sê Sunél.
"Nee," sê Pappa, "verkeerd geraai!"
"Miskien is dit 'n hondjie . . .ek sien iets
beweeg," raai Kobus
Mamma het gehoor hoe opgewonde die twee
kleintjies is en kom kyk waaroor die bohaai is.
"Kan Mamma raai wat dra Pappa in sy arms?" vra
Sunél desperaat.
Maar Mamma weet óók nie wat dit is nie.
"Kom voel hier," sê Pappa.
Dis sag . . . én wollerig.
"Ek weet, ek weet!" skree hulle amper tegelyk.
"Dis 'n lammertjie!"
"Ja, julle het ámper reggeraai. Dis twéé
lammertjies!"
"Hoekom bring Pappa hulle huis toe? Moet hulle
nie by hul mamma wees nie?"
"Hulle moet, maar hul mamma kan nie vir hulle
sorg nie. Sy stamp hulle weg."
"Hoekom, Pappa?" vra die twee kinders.
"Dit is 'n tweeling en hul mamma het te min melk.
Nou moet ons vir hulle warm melk gee en hulle
hier naby die huis in 'n hokkie sit sodat hulle
kan oorleef."
Mamma maak gou-gou die melk warm. Dan gooi sy
die melk in twee koeldrankbottels.
Sunél
en Kobus is baie opgewonde en hou haar met
valkoë dop.
"Kan ons vir hulle die melk gee?" vra Kobus.
"Ja," sê Pappa, "ek het die lammertjies vir
julle gebring om groot te maak. Hulle moet twee
maal op 'n dag melk kry."
"Dit is wat 'n mens hanslammers noem," sê Mamma.
"Kan ons vir hulle name gee?" vra
Sunél.
"Dit is 'n slim plan," sê Mamma.
Sy wys hulle hoe om die bottels vas te hou en
vir die hanslammertjies melk te gee.
Die lammertjies stoot en stamp en slurp te
gulsig die melk op. 'n Mens kan sien hulle is
sommer báie honger. Toe hulle pensies lekker
rondvol is lyk hulle sommer vaak en baie tevrede.
"Het julle al aan name vir die twee lammertjies
gedink?" vra Mamma.
"Ek weet wat hulle name moet wees," antwoord
Sunél.
"Coke en Fanta. Want hulle het uit 'n Coke- en
'n Fanta-bottel melk gedrink."
Hulle het vir Fanta en Coke in 'n hokkie naby
die huis gaan toemaak.
Pappa het strooi neergesit sodat hulle lekker
warm kan slaap.
Die twee was so opgewonde en het kort-kort gaan
kyk of die lammertjies nog gelukkig is. Elke
oggend het hulle vroeg opgestaan en eers vir
Coke en Fanta melk gegee. Coke en Fanta het
hulle geken en as hulle nader kom het hulle al
begin stamp en stoot om by die kinders te kom.
Toe hulle groot genoeg is om grassies te eet het
Pappa, Kobus en
Sunél hulle na die
skaapkraal geneem sodat hulle saam met die ander
skape kan wei.
Kobus en
Sunél
het elke dag gaan kyk of dit nog goed met hulle
twee hanslammers gaan.
|
