|
Haar ma vertel sy het "maar nog van altyd af
gesing".
En nou het Jessie Pretorius (20) haar eerste
twee konsepalbums – een in Afrikaans en een in
Engels – op die mark.
Dié twee polsende praise en worship-albums
klink soos Cascada en is in 'n
Eurodance-popstyl opgeneem.
Dié verwerkings bring 'n styl in Suid-Afrikaanse
worship wat nog nooit van te vore gehoor
is nie, en sal eerder by die jongklomp as by
tradisionele gospel-aanhangers aanklank vind.
Op die Afrikaanse album is daar liedjies soos
Leeu van Juda, Hoe groot is ons God, Onbeskaamd,
Die kruis staan steeds en Die koning is
hier; terwyl die Engelse CD snitte soos
Every time I breathe, Hosanna, How great is our
God en Blessed be your name bevat.
Jessie is die dogter van
Willie Pretorius, en het van kleins-af saam met
hom in sy musiekbedieningsgroep Willie en die
Wenspan opgetree.
Oor die styl van haar twee worship-albums
is sy baie opgewonde: "Dit gaan jongmense
grip. Ek dink hierdie albums kom presies op
die regte tyd vir die nuwe generasie Christen-jongmense."
Sy het in Pretoria grootgeword, skoolgegaan en
studeer tans musiekteater by die TUT (Tshwane
Universiteit van Tegnologie) met vakke soos dans,
drama, kreatiewe beweging en sang.
Maar, soos haar ma sê, sing Jessie al van
kleins-af.
Sy was 6 jaar oud toe sy haar eerste
sangkompetisie gewen het. Daarna het sy saam met
haar pa in sy musiekbedieningsgroep (Wille en
die Wenspan) rondgetoer en landswyd opgetree.
Op 9-jarige ouderdom is sy deel van 'n CD-opname
van dié groep.
Sy was 12 toe sy die TV-kompetisie The Little
Lighthouse gewen het.
Later het sy in voorprogramme opgetree vir Karen
Zoid, Heinz Winckler, David Fourie, Klopjag en
High Five.
Jessie vertel dat haar twee konsep-albums,
Pols en Don't Stop, vir die Christen-jongmens
as alternatief kan dien vir Cascada en
Hannah Montana.
"Almal sal nie van hiérdie Christen-dansmusiekstyl
hou nie, maar dit is gemik op die breë spektrum
van jongmense. Daar is tog reeds Christelike
musiek in elke ander genre!"
Oor die sukses van haar
musiekloopbaan op 'n baie jong ouderdom, lag sy
net: "Ek is my hele lewe gewoond daaraan dat
mense my 'as Willie se dogter' herken het. Ek
het egter besef dat my naam in die
musiek-industrie rondloop toe mense begin sê
'Willie, is Jessie jou dogter?'".
|
