|
Nadat sy Suid-Afrikaners vir
13 jaar lank aan haar voete gehad het, het die
blondekop sangeres Nádine besluit die tyd is nou
ryp om haar vlerke te sprei.
En dít wil sy doen met haar eerste
internasionale album, This Time I Know,
wat so pas uitgereik is.
Die grootste gedeelte van die album is dan ook
in Swede opgeneem, met addisionele werk in
ateljees in België en Suid-Afrika. Die Sweedse
musiekvervaardiger Nick Manic het aan stuur van
dié produksie gestaan.
Suid-Afrikaners is reeds bekend met die
titelsnit, This Time I Know, wat al vir
'n rukkie op plaaslike radiostasies gehoor is.
In die gees van die internasionale mark wat
Nádine met dié album wil bereik, is dié snit, 'n
liefdesballade, deur Nick Manic geregisseer.
Maar om 'n internasionale deurbraak te maak,
gebeur nie sommer oornag nie. Daarvan is Nádine
egter terdeë bewus.
Sy sę sy is gereed en bereid om die lang pad na
internasionale sukses te stap.
"Ek het immers in Suid-Afrika begin deur van
stad tot stad, dorp tot dorp, en fees tot fees
te toer om vir mense te sing en hulle te vermaak.
Ek weet dit verg harde werk, maar ek is rég vir
dié uitdaging."
Die liedjies op die nuwe album is duidelik
gekies met die oog op 'n oorsese gehoor, maar
dit beteken nie dat plaaslike ondersteuners nou
van haar afskeid sal moet neem nie.
"Dit gaan geensins om 'n drastiese fokusskuif
nie," verduidelik sy, "dit gaan eerder oor die
begin van 'n nuwe hoofstuk in my lewe: nóg
musiek. Want musiek is my lewe en my lewe is
musiek."
Sy belowe dat haar plaaslike en lojale
ondersteuners nie bekommerd hoef te wees dat sy
hulle nou gaan afskeep, verstoot en vir die
węreld verruil nie.
Terwyl sy alles in haar vermoë gaan doen om
internasionale erkenning te verwerf, sal sy
altyd haar getroue Suid-Afrikaanse bewonderaars
tevrede stel.
"Dit is hulle wat my die geleentheid gebied het
om my droom ten volle uit te leef en ek sal my
ondersteuners altyd diep in my hart koester."
En net om te bewys dat sy bedoel wat sy sę, het
sy op die plaaslike uitreiking van This Time
I Know, ook drie liedjies in Afrikaans
ingesluit. Die ander 12 liedjies is in Engels,
en op die oorsese mark gemik.
Nádine vertel dit was vir haar 'n
lewensveranderende ondervinding om 'n
internasionale album te skep: "Ek het nog altyd
geweet dit verg harde werk. Die afgelope 13 jaar
in die bedryf was 'n wonderlike leerskool, maar
toe dit opnametyd vir dié album word, het ek
besef ek werk nou met die beste regisseurs,
liedjieskrywers en stemafrigter. Hulle het die
beste in my na vore gebring en ek het vokale
vlakke bereik wat ek nie geweet het ek oor
beskik nie. Dit was soms ontsettend uitmergelend,
maar ek is dankbaar dat ek dié loopbaanrit
aangedurf het."
Hugo Foets, Nádine se bestuurder in België, is
oortuig daarvan dat Nádine oor die talent en
daardie spesiale eienskap beskik om Europese
musiekliefhebbers te oorrompel.
"Die oomblik toe ek haar stem op 'n Afrikaanse
samestelling gehoor het, het ek geweet dié is
ware talent," vertel hy.
Foets bestuur ook vir Dana Winner.
|
