|
Koos van der Merwe is 'n meesterlike digter en
met sy liedjies skep hy werklik musiekprentjies.
In die snit Devolusie gee hy sy
aangrypende blik op ons samelewing wat al meer
ontnugterend word. Dis briljant. Ewe briljant is
Strate van goud. Met die eerste luister
klink dié snit na die mees opgewekte op die
album, maar inderwaarheid laat die lirieke die
lig val op die Christengeloof se verval in die
21ste eeu.
Gaan my nie verby
is beslis die treffer op die album met 'n eie
goedvoel-countryklank.
Die snitte My lied sal opklink,
Naggebed, Herder Jesus en die
titellied Ter wille van die Opdaag, is
weer die meer tradisionele gospelliedjies op die
album. Alhoewel tradisioneel, is dit egter veel
eerliker as baie van die ander liedjies in dié
genre.
"Soms is gospel 'n bietjie oneerlik," sê Koos. "Veral
as 'n mens dink aan al die hartseer wat daar in
die wêreld is. As kunstenaar kan jy nie vir
mense leë woorde gee nie."
Aan leë woorde maak hy hom egter geensins
skuldig nie: Hy verwoord met sy lirieke dit wat
soveel mense voel, na smag en uitspreek –
Christen, al dan nie.
In Stom sing hy: "As ek kan kies laat u
stiltes kom, As ek mag vra draai dit alles om,
En as ek kon kies sal U nader kom."
Gestroopte
eerlike Christenmusiek: Dít is die stempel van
dié album. Voeg daarby die strelende orkestrasie
van Thinus Odendaal (perkussie en tromme), Jake
Odendaal (elektriese- en akoestiese kitaar),
Denny Hodgetts (baskitaar), Danny Antill (klavier
en klawerbord) en Sez Adamson (pedaalstaal), en
jy kry die beste gospelmusiek wat jy vanjaar sal
hoor. Dié CD sal beslis goed vaar tydens
musiektoekenningsaande in die komende jaar.
'n Bonus CD, Stof Psalms: Gebede Gedigte en
Gedagtes, met 98 van Koos se gedigte, is by
die pakket ingesluit. Hiermee bewys hy net
weereens sy talent as digter.
Ervaar besieling en lafenis met die musiek van
dié uitsonderlike kunstenaar.
Koos van der Merwe se debuut solo-album,
Ter wille van die opdaag,
is deur
Broken Records uitgegee en is nou landswyd
beskikbaar.
|
