|
Johannesburgers wat afgeskeep voel omdat hulle
altyd Pretoria toe moet ry vir 'n goeie
Afrikaanse klug, kry nou hul beurt: Op die
publiek se aandrang is die komediespan, wat al
duisende van die lag laat krul het met die
lokettreffers Knypie oppie kant en
Knypie 2 – 'n Dubbeldosis, vanaf 9 – 19
April 2009 in die Nelson Mandela-teater van The
Johannesburg Civic Theatre te sien.
Van die eerste vertonings af was Knypie
Oppie Kant en Knypie 2 – 'n
Dubbeldosis wegholtreffers en kaartjies het
vinnig uitverkoop. As gevolg van die groot
openbare aanvraag uit Johannesburg, het Packed
House Productions en The Joburg Theatre
besluit om Knypie Oppie Kant vir 'n
beperkte seisoen in Johannesburg aan te bied.
Paul Berning, Hoofbedryfsbeampte van Packed
House Productions, sê: "Knypie oppie Kant
was 'n reuse-sukses in Pretoria en het bewys dat
mense nodig het om te lag. Packed House
Productions wil graag aan Johannesburgers ook 'n
bietjie lagterapie bied."
Resensente het in 2008 Knypie Oppie Kant
se lof besing. Paul Boekkooi (Rapport) het
geskryf: ". . . Van Pletzen is ons klugmeester
par excellence . . ." Hy het na ". . . 'n
ensemble van top-akteurs . . ." verwys en die
gehoor aangeraai: "Gaan lag jou diafragma los."
Anna-Retha Bouwer (Beeld) het Knypie as
". . . 'n genotvolle produksie wat gehore laat
skater" beskryf en Adrienne Sichel (Pretoria
News) het gesê Knypie ". . . hits all the
right bawdy buttons", daarna verwys as 'n "saucy
romp" en van die "terrific casting" melding
gemaak. Ook Knypie 2 – 'n Dubbeldosis het
uitstekende resensies gekry met opskrifte soos:
"Vergeet van jou sorge en lag tot jy huil" (Beeld
Plus, 17 Februarie) en "Vat jou lagspier
Knypie-gim toe" (Rapport, 22 Februarie).
Knypie Oppie Kant,
met die oorspronklike titel Two into One,
is deur Ray Cooney geskryf en word as een van sy
snaaksste en slimste komedies beskou. Cooney
word algemeen as een van die wêreld se beste
klugskrywers beskou. Van sy ander klugte wat in
Afrikaans opgevoer is, is My vrou se Man se
Vrou, My Boetie se Sussie se Ou en
Kyk hoe hol hulle.
Die onoortreflike komedie-paar Tobie Cronjé (Daantjie
Rossouw) en Hannes Muller (De Waal Combrink) sal
die gehore weer met hul manewales vermaak. Die
vertaling, verwerking en regie is deur die
meester van verhoogkomedie, Pierre van Pletzen,
gedoen. Packed House Productions het hom al as
vervaardiger van kwaliteit Afrikaanse vermaak en
grootse dekorstelle bewys, waarvan hierdie een
geen uitsondering is nie! Ander bekendes wat
weer in die produksie te sien is, is Hanli
Rolfes-Opperman, Christel van den Bergh en Cobus
Venter.
|
