|
Volgens die uitvoerende hoof van die Klein Karoo
Nasionale Kunstefees op Oudtshoorn (KKNK), Brett
Pyper, lê die klem op gehalte en inklusiwiteit
in die genres waarvoor dié fees die bekendste
is, wat 'n meer gefokusde en kenmerkende
ervaring vir feesgangers sal bied.
Die 15de KKNK-fees vind dié maand vanaf 4 tot 11
April op Oudtshoorn plaas.
Soos van die eerste fees af, sentreer die
2009-program rondom teater en musiek, en op hul
interaksie, asook 'n sterk aanbod van visuele
kunste. Die buitelug karakter van die fees as 'n
konteks vir die kunste word met verskeie
inisiatiewe uitgebou - die fees posisioneer hom
as 'n toonaangewende platform vir internasionale
samewerking, en hy bied sy sterkste program ooit
vir 'n jong volwasse gehoor aan.
Pyper wys daarop dat die konteks waarin die Absa
KKNK sy program saamstel, oor die afgelope 15
jaar heelwat verander het. Waar Oudtshoorn vir
etlike jare die enkele geleentheid gebied het om
teater- en musiekproduksies van groter omvang in
Afrikaans te kan bywoon, het die fees se sukses
tot 'n nasionale kringloop van
Afrikaanssprekende feeste, skouspele, en so meer
gelei, wat vandag 'n verskeidenheid
feesbestemmings aan feesgangers bied, dikwels
nader aan die huis. Die Absa KKNK bly egter
daartoe verbind om oorspronklike werk van omvang
en gehalte voor gehore te help bring wat die
ander feeste deur die res van die jaar bly voed,
en pak dit toenemend in samewerking met
mede-feeste en teaters aan.
Ou
gunstelinge
'n Keur uit die room van die produksies wat
reeds elders in Suid-Afrika en internasionaal te
siene was, en wat dié maand 'n draai by die KKNK
gaan maak, sluit in:
Blou uur, Reza de Wet se nuutste
drama wat deur Kobus Burger as die perfekte
Afrikaanse toneelstuk beskryf is; Schalk
Schoombie se opspraakwekkende stuk Samoerai
wat die grense tussen dramatiese fiksie, die
werklikheid en die nuus fyn losmaak; David
Kramer se Ballade van Koos Sas; Rachelle
Greeff se Die Naaimasjien, wenner van die
Nagtegaal-teksprys, met Sandra Prinsloo in die
hoofrol; Deon Opperman se klassieke stuk Môre
is 'n lang dag, wat 20 jaar na sy
opening deur 'n geselskap wat Robbie Wessels en
Sean Else insluit onder die regie van Albert
Maritz herbesoek word; Every year, every day
I am walking, die Magnet Theatre se
ontroerende stuk fisieke teater wat in agt
Afrika-lande en in Londen met lof ontvang is;
Jericho!, 'n uitsonderlike musikale
vertelling van die Bybelse verhaal met Anna-Mart
van der Merwe, Gys de Villiers, André Howard en
van ons voorste musikante saam met die
Libertas-koor; en die bekroonde Nederlandse
dansgeselskap Introdans, wat na
meer as 'n dekade na Oudtshoorn terugkeer.
Bo en behalwe 'n aanbod wat connoisseurs tevrede
sal stel, dien die Absa KKNK nog altyd as 'n
samekoms vir die land se gewildste kunstenaars
in hul onderskeie genres: onder solo-opvoerings
en skerpskerts is dit Marion Holm, oftewel
Sussie, in haar nuwe show Cheers!,
Shaleen Surtie-Richards se geliefde Shirley
Valentyn, wat 'n jaar na haar opening by die
Absa KKNK en haar ontvangs van die Herrie
gewildheidsprys terugkeer, Karen Wessels in
Groet die Grotvrou, 'n vertaling van
die internasionale treffer deur Koos Kombuis,
Leon Kruger se Suurgat 2, en selfs
'n spesiale feesbesoek deur Leon Schuster.
Beslis aan die
snykant van die uitvoerende kunste in Afrikaans
is: Sakrament, 'n vindingryke en
uitdagende nuwe teks deur Willem Anker met o.a.
Neels Coetzee, Stian Bam, Laudo Liebenberg en
Sophia Wessels onder regie van Marthinus Basson;
en 2-21, 'n "musikale garage-skouspel wat
worstel tussen Hamlet en MTV" waarin Francois
van Coke die hoofrol in 'n toneelstuk speel,
Hunter Kennedy van Fokofpolisiekar die teks
skryf, PH (Peach) van Pletzen van Yesterday's
Pupil musiek verskaf, en in die woorde van
regisseur Jaco Bouwer "'n techno-abattoir vir
ons heilige koeie bied".
San
sal die MK-Kaktus rock-sessies weer vanjaar tot
laataand die grense van Suid-Afrikaanse musiek
bly verskuif met bands soos Foto Na Dans,
Straatligkinders, van Coke Kartel, AKing en vele
ander.
Ander verhoogproduksies wat by die fees vir die
eerste keer gesien word is: Ararat, 'n
omgewingspesifieke toneelstuk wat deur 'n
veelbesproke regisseur-en komponis-span van
Nederland met 'n groep merkwaardige
Suid-Afrikaanse akteurs geskep word; Malika
Ndlovu se veel verwagte Sister Breyani,
'n skreeusnaakse en hartverskeurende intieme
Suid-Afrikaanse verhoogverhaal; Hart van Sand,
'n keur uit Federico Lorca se gedigte wat deur
Robert Jeffrey getoonset is, met sang en
Flamenco-musiek en dans deur die La Rosa Spaanse
Dansteater; Bloedbroers, 'n vertaling van
Athol Fugard se The Blood Knot, geregisseer deur
Zane Meas met Hennie Jacobs en Christo Davids
wat in 7de Laan te siene is; Die Groen Ghoen,
'n inspirerende, omgewingsbewusmakende stuk
fisieke teater met Gys de Villiers en Oscar
Petersen; en Leon Kruger se verhoogverwerking
van sy gewilde radiovervolgverhaal oor Stanley,
Debora en Kniediep, Oupa en ouma sit op die
stoep.
Vanjaar se program getuig ook van 'n opwindende
samewerkingsooreenkoms met Europa se
vooraanstaande fees van omgewingspesifieke kuns,
die Oerol-fees op die eiland van Terschelling
aan die Noord-See.
Pyper verduidelik: "Die pragtige Klein Karoo was
nog altyd die agterdoek vir die fees, maar met
my aankoms op Oudtshoorn was ek opnuut daarvan
oortuig dat ons die uitsonderlike natuurlike en
kulturele eienskappe van die Karoo as 'n
letterlike verhoog en doek kan gebruik. My
besoek aan Oerol verlede jaar het tot 'n
uitgebreide gesprek gelei met praktisyns in die
buiteland en Suid-Afrika wat in
omgewingspesifieke installasies en opvoerings
spesialiseer, en ons kondig met trots ons eie
ekwivalent vir Terschelling Oerol, Oudtshoorn
Oraloor, vanjaar aan. Hiermee komplimenteer
ons die energie en die bekende vibe van
die feeskern met venues wat stilte en
uitsonderlike natuurskoon bied, alles as 'n
unieke, Klein Karoo konteks vir 'n kuns-ervaring.”
Die Oudtshoorn Oraloor aspek van die program
sluit in: Oudtshoorn Trace, 'n
grootskaalse omgewingsinstallasie op 'n heuwel
aan die rand van die dorp wat deur Marcus
Neustetter en Bronwyn Lace opgerig sal word;
Ararat, die koproduksie met die Toneelgroep
De Appel, wat in 'n volstruiskamp langs die
uitsonderlike gallery Moooi net buite Oudtshoorn
teen skemertyd sal speel en daarna by vanjaar se
Oerol-fees in Nederland; en twee
buitelug-teaterstukke wat op Oerol bekendheid
verwerf het: Onder Constructie, 'n
skertsende en komediese aanbieding van die
geselskap De Jongens, waarin 4 akteurs in 11
karakters verander en met 'n aansienlike
hoeveelheid kombuistoestelle te werk gaan; en
Salto Vitale, 'n skouspel wat met
water en vuur tot 14 meter hoog in die lug
afspeel en gehore na hul asem sal laat snak.
Klassieke Musiek
Die substansiële klassieke-musiekprogram, wat
vanjaar 'n Mahler simfonie, uitsonderlike
koormusiek, en kamermusiek insluit, sluit by die
Outshoorn Oraloor-konsep aan, aangesien 'n
aantal venues buite die dorp spesiaal vir
konserte ingerig word. Sopraan Zanne Stapelberg,
kitaarspeler James Grace en altviolis Minette du
Toit-Pierce bied hul nuwe program Musiek uit
die Suide (Canciones del Sur) in die
De Hoop kerk aan, 'n pragtige sandsteengebou
minder as tien minute se ry buite die dorp wat
vanjaar sy eeufees vier, met 'n Klein Karoo-tuin
aangeplant word, en 'n opheffingsprojek vir
handwerkers bedryf. Die internasionaal bekroonde
Pro Cantu Jeugkoor sing ook hier die
Suid-Afrikaanse première van die Estoniese
komponis Arvo Pärt se Passio (Johannes
Passie) tydens die Paasnaweek, terwyl die
besielende Libertas-koor vroeër die week ook
daar optree.
'n
Verdere juweel uit die klassieke musiek-aanbod
wat genoem moet word is 'n konsert ter ere van
Suid-Afrikaanse komponis Kevin Volans, wat
ondanks sy vestiging in Europa jaarliks na
Kruisrivier kom om te komponeer. Volans is
internasionaal die bekendste Suid-Afrikaanse
lewende komponis van sy generasie, en om sy
60ste verjaarsdag te vier, bied die Absa KKNK 'n
reeks spesiale verjaarsdagkonserte op die plaas
teen die hange van die Swartberge aan waar van
die musiek geskryf is.
Beeldende
Kuns
Die De
Hoop kerk is op die pad na Kruisrivier, waar
Hanneke Benade se kunsuitstalling verlede jaar
uitverkoop en 'n Kanna-toekenning verwerf het,
en waar sy weer vanjaar kurator is van 'n
uitstalling met die landskapwerk van Walter
Meyer en Albert Redelinghuys.
Nog 'n kunstenaar wat in die Klein Karoo
skeppende werk doen en internasionale bekendheid
verwerf het is ons feeskunstenaar vir visuele
kuns, Hylton Nel, wie se guitige keramiekstukke
in die buiteland gesogte versamelstukke is en
vanjaar vir die eerste keer by die Absa KKNK te
siene is. Deur die oog van ons nuwe kurator,
Johan Myburg, ontdek feesgangers vanjaar 'n ryk
verskeidenheid kunsvorme wat die geskakeerdheid
van die Suid-Afrikaanse visuele kunste
weerspieël.
Kontemporêre musiekproduksies
Onder
kontemporêre musiekproduksies, is daar tussen
die talle sterre Amanda Strydom (haar 15de KKNK),
wat vanjaar saam met Lize Beekman optree, Anna
Davel, André Schwartz, Chris Chameleon, Cutt
Glas (ook hulle 15de KKNK), ddisselblom, die
Gespanne Passasiers, Jaco Blomerus, Jak de
Priester, Koos Kombuis, Laurinda Hofmeyr, Lucas
Maree se welkom toetrede tot die verhoog, Navi
Redd, Nianell, Ollie Viljoen, Schalk Joubert,
Ses Snare, die briljante malkop span van Stok,
Stef Bos, Steve Hofmeyr, Wouter Kellerman, en
Zamar.
En dan het ons nog nie eers van die Huisgenoot
Musiekplaas melding gemaak nie, wat vanjaar weer
beide 'n dag- en 'n aandprogram op twee verhoë
aanbied, Die Burger se Tongelos-tent, die SAB
Hap 'n Tap Feeskasteel, die Klip-inni-Bos, die
RSG, en 'n reeks ander buiteverhoë by die fees,
waar ons vanjaar met ons borge en medewerkers
gewerk het om 'n beter gehalte en wyer
verskeidenheid van musiek as ooit tevore te bied.
In besonder kan feesgangers uitsien na 'n
aantreklike musikale gesprek tussen die talle
tradisionele musiekstyle van die Kaapse
platteland op die !Garob SABC2 verhoog, wat
vanjaar by die amfiteater in die feeskern
aangebied word. Hier sal verbygangers by tye van
die dag boeremusiek, vastrap, rielmusiek,
langarm, jazz en hip-hop teëkom, alles deel van
die hedendaagse verkenning van die gedeelde
oorspronge van Afrikaanse gemeenskapsmusiek.
|
